Categories Navigation

Categories Navigation

El Gobiernu d’Asturies sofita la propuesta de la vicepresidenta Ribera pa subir cien millones a les compensaciones a la industria peles emisiones de CO2

17/06/2021

  • L’Executivu considera que l’aumentu ye “una bona noticia que va favorecer la competitividá de les nuestres empreses”.
  • Destaca l’axilidá de la ministra de Transición Ecolóxica p’atender la petición presentada pol presidente Barbón y el conseyeru d’Industria.
  • “Confiamos en que l’añu que vien la dotación presupuestaria algame’l tope máximu previstu na Llei de Cambéu Climáticu”, asegura’l Principáu.

El Gobiernu d'Asturies sofitó la propuesta avanzada güei pola vicepresidenta Teresa Ribera p’aumentar en cien millones les compensaciones a la industria polos costos indirectos por emisiones de dióxidu de carbonu. “Ye una bona noticia que va favorecer la competitividá de les empreses asturianes”, afirmaron fontes del Executivu.

Ribera, que lidera'l Ministeriu de Transición Ecolóxica y Retu Demográficu, compareció esta mañana nel Congresu de los Diputaos. Na so intervención anunció que’l so departamentu ta trabayando colos ministerios d'Industria y Facienda p’alzar la dotación reservada nos presupuestos pa compensaciones de CO2. Tanto'l presidente del Principáu, Adrián Barbón, como'l conseyeru d'Industria, Enrique Fernández, solicitaren esti aumentu. Esta mesma mañana repitiéralo’l xefe del gobiernu na Xunta Xeneral.

La medría de les compensaciones ye una demanda compartida de toles fuerces polítiques, sindicales y empresariales que suscribieron l'Alianza pola Industria, incluyíu'l Gobiernu d'Asturies. La Llei de Cambéu Climáticu, aprobada apocayá, yá incorpora una previsión específica por que cada añu puedan destinase’l 25% de los ingresos del CO2 a menguar los costos de la industria. Esi porcentaxe ye'l tope que dexa la Unión Europea.

En cuantes que la llei recoyó espresamente esa posibilidá, l'Executivu del Principáu propunxo que s'ampliara la cantidá prevista pa esti exerciciu, cifrada anguaño en 79 millones. Con cien más, va sumar 179 millones. “Ye, a les clares, una señal bien bona que demuestra que'l Gobiernu d'España ye sensible al impactu de la cotización del dióxidu de carbonu nel texíu productivu, y en particular nes industries electrointensivas”, valoró l'Executivu autonómicu. “Amás, confiamos que l'añu que vien la dotación presupuestaria algame'l tope máximu previstu na Llei de Cambéu Climáticu”, añedió.

La vicepresidenta Ribera tamién anunció nel Congresu que'l gobiernu ta sopesando la posibilidá de suspender temporalmente l'impuestu del 7% a la xeneración. Esta decisión dexaría abaratar el recibu pa los y les consumidores nun escenariu especialmente complexu onde'l preciu de la lluz subió pola coincidencia de dos factores: l'encarecimientu de los precios de la tonelada de C02 y del gas, per un sitiu, y l'aumentu de la demanda eléctrica a consecuencia de la medría de les temperatures, por otru.

El Gobiernu del Principáu destacó l’axilidá de la ministra Teresa Ribera p’atender los planteamientos del Executivu autonómicu y lliderar l’adopción de midíes que beneficien tanto al sector industrial como al conxuntu de la ciudadanía.