Categories Navigation

Categories Navigation

El Principado solicita al Ministeriu d’Agricultura la declaración d’Asturies como zona llibre de tuberculosis bovina

17/06/2021

  • La comunidá lleva cuatro años con una prevalencia de la enfermedá na cabaña ganadera de menos del 0,1%.
  • Mediu Rural va mantener la campaña de saneamientu los dos años próximos pa prevenir posibles brotos.

La Conseyería de Mediu Rural y Cohesión Territorial empecipió los trámites pa solicitar al Ministeriu d'Agricultura, Pesca y Alimentación la declaración d'Asturies como zona llibre de tuberculosis bovina. La comunidá lleva dende 2017 con una prevalencia de la enfermedá na cabaña ganadera inferior al 0,1%, cuando'l Gobiernu central establez como requisitu mínimu llevar trés años consecutivos per debaxo d'esi baremu.

El director xeneral de Ganadería y Sanidá Animal, Nino Rodríguez, que güei participó nuna xornada sobre saneamientu, esplicó qu'Asturies yá cumple colos parámetros esixíos al disponer d'un sistema d'identificación y rexistru d'animales de la especie bovina, acordies con el reglamentu de la Comisión Europea de 1997, y les reses sacrificaes son sometíes a un posterior exame oficial. Amás, satisfai tamién los procedimientos de suspensión y retirada del estatutu de rebañu oficialmente indemne de tuberculosis.

La declaración de zona llibre de tuberculosis bovina diba suponer un pasu importante na sanidá animal d'Asturies. Por casu, ente otres ventayes, les ganaderíes nun tendríen que facer pruebes a los animales pa dir a camperes d'otres comunidaes o pa la so vienta.

Rodríguez valoró'l trabayu realizáu nesti ámbitu y señaló que, a pesar de los bonos resultais, ye imprescindible nun baxar la guardia, polo que nos dos próximos años van caltener les campañes de saneamientu en tola cabaña ganadera pa prevenir posibles brotos. Tamién va siguir la vixilancia pasiva nos mataderos y los controles na fauna montesa.

La execución del programa ye requisitu indispensable p'ameyorar les condiciones sanitaries de les esplotaciones y favorecer los intercambios comerciales d'animales y los sos productos. Por tanto, ye una garantía y un aval pa les ganaderíes asturianes, tanto a nivel européu como estracomunitariu, mesmo que pa los consumidores de carne y lleche.

L'orixe de les campañes oficiales contra la tuberculosis bovina n'Asturies remóntense a la década de los años 80 del sieglu pasáu y son obligatories pa toles esplotaciones dende 1986. El programa de desaniciu ye una normativa d'ámbitu nacional, ellaborada pol Ministeriu d'Agricultura en collaboración con toles comunidaes y aprobáu pola Unión Europea.

La tuberculosis ye una enfermedá crónica qu'afecta a distintes especies d'animales. La prueba oficial de diagnósticu in vivo ye la intradermotuberculinización (tuberculina), que diagnostica exemplares infectaos, amás d'enfermos. Nun esisten pruebes contradictories nin contraanálisis pa esta prueba.


Declaraciones del Director General de Ganadería (Mp3: 237 Kb)