Categories Navigation

Categories Navigation

Igualdá organiza la primer edición de la Feria d’Entamadores d’Asturies

17/06/2021

  • El programa, que se va desenvolver mañana y pasao, incluye meses redondes, clases maxistrales, conferencies, sesiones d’intercambéu ente profesionales y talleres.
  • Tolos detalles sobre estes xornaes, que yá tienen más de 115 persones inscrites, puen consultase na páxina web www.feriaemprendedoras.com.

La Dirección Xeneral d’Igualdá organiza la I Feria d’Entamadores d’Asturies, con vocación de celebrase anualmente, y onde van participar más de 30 entamadores asturianes. L’eventu va desenvolvese online anguaño por causa de la pandemia sanitaria, coles mires de poner en valor la contribución a la economía de les empreses xestionaes por muyeres.

El programa incluye la participación d’entamadores, sobre manera del ámbitu rural, que van presentar los sos trabayos, y suma yá más de 115 persones inscrites. Amás, a lo llargo de les dos xornaes van emitise na canal de Youtube del Centru d’Innovación y Economía n’Igualdá (https://www.youtube.com/channel/UCuJ0V7PrBb8aew89niSXD0g) cuatro meses redondes, dos clases maxistrales, 5 conferencies y dellos talleres en llinia que van dexar compartir esperiencies y formación.

La pandemia de la covid-19 obligó a les entamadores asturianes a tresformase y encarar cambeos na xestión de los sos negocios, un retu sobre’l que van informar a les persones inscrites nes xornaes. La presentación de los proyectos empresariales va alternase con ponencies sobre aspectos qu’influyen nes muyeres cuando deciden entamar, como la corresponsabilidá, la resiliencia, la seguranza o l’empoderamientu.

Pa eso, la primer edición de la feria va cuntar con muyeres referentes a nivel nacional como Maite Egocozabal, responsable d’investigación social del Club de Malasmadres y de l’Asociación Yo No Renuncio; Mariana Pérez Panizo, esperta n’optimización empresarial; Neus Albertos Meri, especialista en xéneru y igualdá d’oportunidaes, y María del Olmo, psicóloga y formadora en comunicación. Amás, participen l’Asociación de Muyeres d’Empreses d’Economía Social del Principáu (Amespa), la Federación d’Asociaciones de Muyeres Rurales (Fademur), la Fundación Muyeres y l’Asociación Empresa Muyer (Asem).

Tamién tán previstes dos ponencies sobre aspectos de relevancia na xestión de los negocios: la comunicación y l’impactu nes redes sociales y la meyora de los procesos de la empresa pa llograr más resultaos.

L’eventu ta coordináu pel Centru d’Innovación y Economía n’Igualdá y financiáu pol Institutu Asturianu de la Muyer. La directora xeneral d’Igualdá, Nuria Varela, va ser la encargada d’inaugurar les xornaes, mañana, a les 10:00 hores. El programa completu pue consultase na páxina web www.feriaemprendedoras.com, onde tamién se pue formalizar la inscripción.


 Programa I Feria Emprendedoras de Asturias (pdf: 425 Kb)