Categories Navigation

Categories Navigation

La Conseyería de Ciencia pon en marcha llaboratorios d’innovación social en conceyos con menos de 20.000 habitantes

17/06/2021

  • El Gobiernu d’Asturies destina 1,6 millones a los centros de dinamización local p’averar la investigación a la ciudadanía.
  • El programa va impulsar proyectos de divulgación y tecnoloxíes nueves qu’ayuden a modernizar la zona rural.
  • Borja Sánchez reunióse güei colos alcaldes y alcaldeses de la Comarca de la Sidra, que van presentar un proyectu a comuña pa los seis conceyos integraos na entidá.

El Principáu pon en marcha llaboratorios d’innovación social en conceyos de menos de 20.000 habitantes. La Conseyería de Ciencia destina 1,6 millones a proyectos que tengan como oxetivu averar a la ciudadanía la investigación, la tresformación dixital y les tecnoloxíes nueves. El conseyeru Borja Sánchez reunióse güei colos alcaldes y alcaldeses de la Comarca de la Sidra pa esplicar el programa, onde van participar de forma coordinada con una propuesta pa los seis conceyos que formen parte d’esta entidá.

Los Centros actuales de Dinamización Tecnolóxica Local (CDTL) –alredor de 70 en tola comunidá- van ser los qu’actúen como llaboratorios innovadores. Pa eso, han presentase proyectos en concurrencia competitiva que van tener como fin ayudar a la modernización de la so zona, sobre manera nes árees rurales. Tanto les bases como la convocatoria posterior van publicase nos díes vinientes.

Borja Sánchez punxo de relieve la importancia d’esti programa, que trata de reivindicar y impulsar l’acción d’estos centros de dinamización que dependen de cada conceyu y conocen de primer mano les necesidaes del so territoriu. “Queremos que los conceyos pequeños y sobre manera la zona rural tengan les mesmes oportunidaes d’accesu a la tecnoloxía, al conocimientu y a la innovación”, destacó.

Ente les actividaes que traten de promovese inclúyense la promoción, divulgación y difusión de la innovación y la tresformación dixital; l’impulsu de la ciencia ciudadana, la meyora de la conectividá nel territoriu y la empleabilidá y modelos nuevos de negociu vinculaos a la dixitalización y les tecnoloxíes 5G.

Tamién quier potenciase’l trabayu en collaboración, por exemplu, cola iniciativa de la Rede de Conceyos con Ciencia, a la que yá se xuntaron más d’una trentena de conceyos. Esta iniciativa trata d’impulsar actividaes de divulgación en toles árees de conocimientu, lluchar cola resquiebra de xéneru y fomentar les vocaciones científiques con actuaciones en cada territoriu y itinerantes.

El titular de Ciencia reunióse con representantes de tolos conceyos de la Comarca de la Sidra nel CDTL de Nava. Nel alcuentru participaron l’alcaldesa de Colunga, Sandra Cuesta; los alcaldes de Nava, Juan Cañal; Bimenes, Aitor García; Sariegu, Saúl Bastián; Cabranes, Gerardo Fabián; y l’alcaldesa accidental de Villaviciosa, Lorena Villar.

Borja Sánchez punxo esta mancomunidá como modelu del programa d’innovación social nel territoriu, porque la comarca va presentar una propuesta conxunta de la que se va beneficiar la población de los seis conceyos. Amás, animó a tolos conceyos con menos de 20.000 habitantes a que presenten proyectos a esta convocatoria, qu’aumenta en 300.000 euros los fondos destinaos a los centros de dinamización.

La Conseyería de Ciencia, Innovación y Universidá incluyó los llaboratorios d’innovación social dientro de les manifestaciones d’interés pa optar a fondos europeos al considerar que son una iniciativa estratéxica pa la zona rural y pueden ayudar a xenerar modelos nuevos de negociu y afitar población. 


 Declaraciones del Consejero de Ciencia, Innovación y Universidad, Borja Sánchez (mp3: 815 KB)