Categories Navigation

Categories Navigation

Principáu, Gobiernu central y conceyos firmen la puesta en marcha de los proyectos de turismu sostenible d’Onís y Somiedu

17/06/2021

De izquierda a derecha, el alcalde  de Somiedo, Belarmino Fernández; el secretario de Estado de Turismo, Fernando Valdés; la consejera de Cultura, Berta Piñán  y  el alcalde de Onís,  José Manuel Abeledo

  • L’Executivu autonómicu va destinar 1,1 millones a les propuestes de los dos conceyos, escoyíes nel programa Planes de sostenibilidá turística en destín.

El Principáu y el Gobiernu d’España, al traviés de la Secretaría d’Estáu de Turismu y de la Conseyería de Cultura, respectivamente, y los conceyos d’Onís y Somiedu firmaron güei convenios pa la execución de los planes de sostenibilidá turística de dambos conceyos.

El secretariu d’Estáu de Turismu, Fernando Valdés; la conseyera de Cultura, Política Llingüística y Turismu, Berta Piñán, y los alcaldes d’Onís, José Manuel Abeledo, y de Somiedu, Belarmino Fernández, firmaron les certificaciones oficiales que validen la puesta en marcha de les propuestes escoyíes pola Comisión Sectorial de Turismu en xunu del 2020, nun actu celebráu esta mañana en Llaboral Ciudá de la Cultura.

Los proyectos van cuntar con financiamientu de les trés alministraciones, de manera que’l Gobiernu central y l’Executivu asturianu van facese cargu d’un 40 % del costu caún, mentes que los conceyos van asumir el 20 % restante. La propuesta d’Onís tien un presupuestu de 800.000 euros y la de Somiedu xube a 1.870.000. En total, el Gobiernu d’Asturies destina a dambes iniciatives 1.100.000 euros.

El Plan de sostenibilidá turística de Somiedu articúlase en cuatro exes: la recuperación y puesta en valor del patrimoniu natural y etnográficu pal so usu turísticu, la meyora de la ufierta y la creación de productos sostenibles, y la promoción y comercialización del destín turísticu sostenible. El Conceyu va poner 374.000 euros.

El plan d’Onís, Ecoturismo en Los Picos d’Europa, incluye cinco llinies d’actuación: la creación de productos ecoturísticos basaos en recursos naturales y culturales, la promoción de productos locales, la meyora del comportamientu ambiental, la propia capacitación y xestión del plan, y les acciones de promoción. El Conceyu d’Onís va dedicar 176.000 euros a esti proyectu.

 

Dinamización social y cultural

La conseyera Berta Piñán esplicó qu’estos planes “nun tienen que vese namás como proyectos turísticos, porque tienen la vocación de convertise en motores de l’actividá económica nes zones rurales y incidir na vida de los sos habitantes y na dinámica social y cultural d’Onís y Somiedu”.

Según destacó, dambos proyectos tienen en común la vocación de protexer los recursos y productos propios del so ámbitu territorial, la mengua del impactu ambiental de l’actividá turística, el control de los fluxos de visitantes y el fomentu de la movilidá sostenible.

A esta primer convocatoria del Programa de planes de sostenibilidá turística en destín presentáronse otros seis conceyos: Castropol, Valdés, Ḷḷena, Cabrales, Uviéu y Cangues d’Onís, amás de cuatro mancomunidaes: Comarca Ozcos-Eo, Cinco Villes - Comarca Nalón de Baxo, Comarca d’Avilés y Comarca de la Sidra.

La Conferencia Sectorial de Turismu celebrada nel mes de marzu pasáu aprobó una convocatoria ordinaria nueva d’esti programa que va financiar la Secretaría d’Estáu de Turismu con 23 millones recoyíos nos Presupuestos Xenerales del Estáu.

Antes de la firma, el secretariu d’Estáu de Turismu, Fernando Valdés, tuvo un alcuentru con dellos responsables del sector turísticu, al qu’asistió tamién la viceconseyera de Turismu, Graciela Blanco.

La xornada complétase cola visita del secretariu a Onís, onde va conocer el camping Picos d’Europa, la cueva Escura y la quesería Demúes, y na que va tar acompañáu pola conseyera de Cultura y la viceconseyera de Turismu.


Declaraciones de la Consejera de Cultura