Asturies zarra xunetu con una cayida histórica del paru: 7.194 desempleaos menos y el meyor rexistru dende últimos del 2008
- La baxada, del 9,94 % al respective de xunu y del 16,06 % en términos interanuales, ye la más pronunciada de les últimes dos décades
- El Principáu, con 65.165 demandantes, ye la segunda comunidá con más mengua mensual depués de Baleares
- La industria baxa pela primer vez de los 5.000 paraos, un datu que nun s’algamaba dende’l 2005, y un total de 987 menores de 25 años atopen empléu
- Les afiliaciones a la Seguridá Social aumenten en 4.735 y el volume de cotizantes recupérase hasta asitiar en niveles de va diez años
Asturies zarró xunetu con una cayida histórica del paru: 7.194 paraos menos, lo qu’asitia la cifra de demandantes d’empléu en 65.165 persones, el meyor datu rexistráu dende avientu del 2008, según los datos publicaos güei pol Ministeriu de Trabayu y Economía Social.
La baxada algama’l 9,94 % al respective de xunu y el 16,06 % en términos interanuales, con 12.468 paraos menos qu’en xunetu del 2020. En dambos indicadores la evolución del Principáu vuleve ser más favorable que la media estatal: 4,5 puntos superior en cómputu mensual (-9,94 % frente al -5,47 %) y más de 6 en términos interanuales (-16,06 % frente al -9,45 %). Asturies foi, depués de Baleares, la comunidá con más cayida del paru en xunetu.
D’esta manera, xunetu foi’l quintu mes con baxaes del desempléu, un enclín qu’empezó en marzu. Si se garra febreru como referencia, cuando se rexistró una media de 85.781 paraos, la más alta de magar empezó la pandemia, el paru baxó en 20.616 persones dende entós, quier dicise, un 24,03 %.
El desempléu amenorgó’l mes pasáu en tolos sectores d’actividá, en dambos sexos y en tolos grupos d’edá, sobre manera ente menores de 25 años, con una cayida de 19,54 %, lo que supón que cerca d’un millar de mozos atoparon empléu n’Asturies nos postreros trenta díes. En comparanza con xunetu del 2020, el paru nesti colectivu baxó’l 23,93 %. La mocedá ye ún de los grupos prioritarios de les polítiques actives d’empléu que desenvuelve’l Gobiernu d’Asturies p’ameyorar l’inxertamientu llaboral.
Actividaes productives
Toles actividaes productives rexistraron una evolución positiva, sobre manera’l sector servicios, con 4.880 paraos menos (-9,36 %) y una recuperación del empléu concentrada na hostelería, el comerciu al pormenor y los servicios a edificios. Al respective de xunetu del 2020, el descensu ye de 8.153 persones (-14,71 %).
Tamién foron notables los descensos nel colectivu de persones ensin empléu anterior (-1.149 paraos menos y -14,84 %) y nel sector primariu (-9,93 %). Pela so parte, tanto la industria (-9,37 %) como la construcción (-9,19 %) caltienen l’enclín positivu de los últimos meses. Dambos sectores son los qu’amuesen una evolución interanual más favorable en términos porcentuales, superior al 20 %.
Nel casu de la industria, en xunetu había 4.951 paraos, un 25,87 % menos que nel mesmu mes del 2020. D’esta manera, el paru nesti sector baxó de los 5.000 demandantes, un nivel que nun se rexistraba dende primeros del branu del 2005, según Sadei. En xunetu, les empreses industriales formalizaron 3.665 contratos.
Tocante a la contratación, en xunetu contabilizáronse 32.955 contratos, un 10,76 % más que’l mes anterior, de los que 2.203 foron indefiníos.
Esta evolución traduzse nel aumentu de les afiliaciones a la Seguridá Social en 4.753 persones, hasta llegar a 371.262, una cifra que nun se algama dende’l 2011. En xunetu, el númberu de cotizantes medró’l 1,29 %, mentes que nel últimu añu recuperáronse 10.976 puestos de trabayu.
Otra manera, el númberu de persones trabayadores en situación de regulación d’empléu (ERTE) sigue baxando y asítiase anguaño en 5.014, 2.366 menos qu’en xunu. Según los datos del Ministeriu d’Inclusión, Seguridá Social y Migraciones, dende abril del 2020, cuando Asturies llegó a algamar un máximu de 59.221 trabayadores n’ERTE, 54.207 salieron d’esta situación; más del 91 %.
La directora xerente del Serviciu Públicu d’Empléu (Sepepa), Pilar Varela, destacó la mengua tan fuerte del desempléu rexistráu, l’aumentu de la contratación y la meyora de les afiliaciones, especialmente ente les persones moces.
A pesar d’esta evolución positiva, Varela repitió que la incidencia del paru entá ye alta, polo que’l Gobiernu d’Asturies va caltener les sos prioridaes y compromisos políticos col sostenimientu y refuerzu de tolos programes d’inxertamientu y polítiques actives d’empléu alcordaos colos axentes sociales nel marcu de la concertación.
