• Los trabayos enmárquense nun plan integral pal monte que prevé inversiones por valor de 450.000 euros.

La Conseyería de Mediu Rural y Cohesión Territorial sacó a llicitación en 125.122 euros, IVA incluyíu, les obres p’acondicionar los accesos y la redolada del área recreativa del Cordal de Pion, en Villaviciosa. Esta actuación va facilitar l’accesu de vehículos privaos, camiones, tractores y maquinaria forestal. La empresa axudicataria va tener un plazu de cuatro meses pa executar los trabayos.

Los llabores van centrase nel arreglu integral del camín pel que se llega al área recreativa, pa lo que se va reponer dafechu’l firme y van construyise cunetes nueves y pasos d’agua qu’eviten desperfectos y dexen un meyor caltenimientu.

L’área recreativa del Cordal de Pion ufierta una de les panorámiques más espectaculares de los conceyos de Villaviciosa y Xixón, polo qu’atrái a munchos visitantes. Amás, la zona tien tamién valor arqueolóxicu, con presencia de dólmenes, y potencial lúdicu, deportivu y paisaxísticu. Dispán, aparte, de parrilles, meses y zarros que van restaurase nesta intervención.

La obra entámase nel marcu d’un plan integral pal Cordal de Pion, un pulmón verde de la contorna y ún de los montes más rentables y productivos d’Asturies. Esti plan incluye una segunda actuación en pistes forestales, valorada en más de 125.000 euros, y una partida adicional de 200.000 pa plantar pinos y frondoses autóctones, colo que la inversión prevista xube a 450.000 euros.