• El vicepresidente Juan Cofiño visitó güei les obres, que se desenvuelven nes localidaes de L’Infiestu, Valle y La Piñera.

El Gobiernu d’Asturies invierte 551.633 euros nes obres de meyora de la rede de saniamientu de Piloña, que se desenvuelven nes localidaes de L’Infiestu, Valle y La Piñera pa evitar vertíos a calces fluviales. L’actuación, financiada pol Institutu pa la Reestructuración de la Minería de Carbón y Desenvolvimientu Alternativu de les Comarques Mineres, empieza en xunu y tien un plazu de 24 meses.

El vicepresidente Juan Cofiño visitó güei’l conceyu acompañáu pol so alcalde, Iván Allende, pa comprobar sobre’l terrén la evolución de los trabayos, que van beneficiar a 350 habitantes.

En L’Infiestu, les obres van dexar suprimir los vertíos a El Ríu Piloña procedentes de los edificios asitiaos na cais Martínez Agosti y Puente Nuevo. Pa llograr esti oxetivu, va construyise un colector de 141 metros de llargor que va recoyer los vertíos y va conectar col colector xeneral de la rede. Amás, van suprimise los vertíos al ríu del bloque de viviendes de la cai Cuadonga y del institutu de Secundaria, qu’en dambos casos van conectar a los colectores de la rede actual de saniamientu.

Per otru llau, la intervención en Valle va implicar la creación d’un colector de 1.673 metros de llargor, que va conectar col colector interceptor del Piloña, de manera que se van evitar los vertíos al ríu de Valle y van dirixise pal so tratamientu a la estación depuradora de Ricáu, nel conceyu de Parres.

Finalmente, les actuaciones en La Piñera busquen evitar vertíos puntuales a El Ríu Color, pa lo que se van executar dellos ramales de saniamientu y un colector principal. La obra va implicar 841 metros de colectores y la construcción d’un alliviaderu.

Declaraciones del Vicepresidente Juan Cofiño (mp3: 554 Kb)