• La esposición Asturies, Camín al andar percuerre los trés itinerarios xacobeos de la comunidá con paneles, semeyes y mapes de gran formatu .
• Les persones que visiten la Fidma van poder fotografiase nun photocall de gran tamañu y disfrutar de delles propuestes culturales del programa Asturies, Cultura en Rede.

El pabellón del Gobiernu del Principáu de la Feria Internacional de Muestres d’Asturies (Fidma), que s’inaugura mañana en Xixón, va tar dedicáu nesta edición a los Caminos de Santiago d’Asturies, declaraos Patrimoniu de la Humanidá y protagonistes en bona midida de la cultura y el turismu na comunidá con motivu del Xacobeo 2021-2022.

L’estand va acoyer hasta’l 22 d’agostu la esposición Asturies, Camín al andar, una gran muestra sobre les trés rutes xacobees que traviesen el Principáu y na que con paneles, semeyes y mapes de gran formatu ufiértase al visitante la posibilidá de conocer o de revisitar con detalle les característiques del Camín Primitivu, el Camín de la Costa y el Camín del Salvador. La muestra tien el so complementu dixital cola web http://www.asturiescaminalandar.es/, que se va presentar el día 15.

En xunetu del 2015, la Unesco declaró Patrimoniu de la Humanidá los llamaos Caminos de Santiago del Norte, ente los que s’incluyen cuasi 520 quilómetros de les rutes xacobees asturianes, que traviesen más de 30 conceyos. A estos itinerarios, qu’a lo llargo de los sieglos llevaron a millones de pelegrinos hasta Santiago de Compostela, ta dedicada Asturies, Camín al andar.

La esposición percuerre momentos históricos de los Caminos d’Asturies, onde anició’l mitu xacobéu que cunta que’l primer pelegrín a Santiago foi’l rei asturianu Alfonso II el Castu, qu’auspició la fundación de lo que col tiempu diba acabar convirtiéndose na esplendorosa Compostela.

A esti primer itinerariu, que sal de la catedral de San Salvador n’Uviéu, xuntóse llueu’l Camín de la Costa, que percuerre tola marina rexonal. A ellos súmase’l ramal que los xunta, el llamáu Camín d’El Salvador, qu’usaben los pelegrinos qu’escueyen el Camín Francés y deciden esviase escontra la capital asturiana al altor de Llión.

Amás de los paneles, mapes y semeyes, la muestra tien un audiovisual onde los pelegrinos son los grandes protagonistes, con una réplica de la imaxe del apóstol Santiago que’l so orixinal caltiénse nel Muséu d’Arte Sacru de Tinéu y con una réplica del frontal del Arca Santa de la catedral d’Uviéu. La exhibición complétase con un photocall de gran tamañu que simula una parada del Camín de Santiago de la Costa (nel conceyu de Corvera), un espaciu informativu sobre los alimentos asturianos vinculaos a esta tradición milenaria o una pantalla pa consultar l’axenda d’actividaes del Xacobéu 2021-2022.

Actividaes culturales

La Conseyería de Cultura integró na programación del pabellón estes propuestes del programa Asturies, Cultura en Rede:

• 7 y 8 d’agostu, de 12:00 a 14:00 y de 18:00 a 20:00 hores, Leyendas del Camino, de Guayominí Producciones.
• 13 d’agostu, de 18:00 a 20:00 hores, y 20 d’agostu, de 12:00 a 14:00 hores, gymkhana dixital El primer peregrino, de Blinca.
• 14 y 15 d’agostu, de 12:30 a 14:00 hores, Ruta primitiva por Asturias del Camino de Santiago a través del vestuario, de Maite Capín.
• 16 d’agostu, a les 13:00 y a les 19:00 hores, Peregrinas, de Musa Cafeína.
• 21 d’agostu, de 18:30 a 20:00 hores, y 22 d’agostu, de 12:30 a 14:00 hores, El Xuglar del Camín, de Carlos Alba.

El pabellón del Gobiernu d’Asturies en Fidma va tar abiertu al públicu del 7 al 22 d’agostu, de 11:00 a 14:00 y de 16:00 a 21:00 hores.