Categories Navigation

Categories Navigation

Educación saca un total de 958 places na segunda convocatoria d’interinidá

14/09/2021
  • La llista incorpora 285 puestos de refuerzu covid tanto n’Infantil y Primaria como en Bachilleratu y FP


La Conseyería d’Educación publicó güei la segunda convocatoria de places p’aspirantes a interinidá del cursu que vien con un total de 958 puestos, ente los que destaquen los 285 específicos de refuerzu covid pa Infantil, Primaria, Bachilleratu y Formación Profesional (FP).

Estes places confirmen l’esfuerciu del Gobiernu del Principáu por fortalecer el sistema educativu frente a la pandemia. Les dos primeres convocatories d’esti cursu sumen 4.102 puestos. A estos hai que sumar otros 540 ente funcionarios en práctiques tres de les oposiciones y comisiones de serviciu. Nes dos primeres del añu pasáu, publicáronse 4.254.

Dientro d’estes 285 places de sofitu covid que s’incluyeron güei, atópense 238 d’especialistes en Pedagoxía Terapéutica (PT) y Audición y Llinguaxe (AL), ente medies xornaes y completes.

Estos puestos, qu’apaecen estremaos con una D na llista de la convocatoria, correspuenden a necesidaes especiales covid, tienen calter escepcional y tán destinaos a dar respuesta al alumnáu que presenta necesidá de sofitu especializáu nel cursu 2021/2022 de resultes de la pandemia.

La Dirección Xeneral d’Ordenación, Evaluación y Equidá Educativa va ponese en contactu coles unidaes y los equipos d’orientación y tamién coles direcciones de los centros que tengan asignaos estos especialistes en PT y AL consideraos refuerzu covid pa detallar cómo se tienen qu’utilizar esos recursos estra.

En total, ente les places estructurales y los sofitos específicos pol coronavirus, anguaño la plantiya de Pedagoxía Terapéutica aumenta un 14 % en comparanza col cursu pasáu y la d’Audición y Llinguaxe, un 31 %.

Les 47 places restantes d’esti refuerzu correspuenden a FP y Bachilleratu, en centros que tuvieron en semipresencialidá y esti cursu presentaben más dificultaes pa recuperar la presencialidá dafechu.

Nel casu de Bachilleratu, la Dirección Xeneral de Personal Docente atendió tolos pidimientos presentaos polos equipos directivos.

La Dirección Xeneral d’Enseñances Profesionales analizó casu a casu coles direcciones de los centros qu’imparten FP pa iguar les dificultaes nel cumplimientu de la distancia. Les places covid van dexar desdoblar módulos de los ciclos afectaos o caltener dos docentes n’aula. Pola singularidá tan especial de los ciclos, que vuelven a les aules el 17 de setiembre, entá queden pendientes d’asignar más vacantes.

El periodu pa que los 5.418 aspirantes a interinidá convocaos pidan plaza va allargase hasta les 10:00 hores del 16 de setiembre del 2021. Los axudicaos van incorporase a los sos centros a partir del llunes, 20 de setiembre.