Categories Navigation

Categories Navigation

El Principáu invita a conceyos, axentes sociales, empreses y profesionales a plantegar les sos aportaciones al programa de refuerciu de l'atención domiciliaria a la dependencia

15/09/2021
  • La conseyera de Derechos Sociales convocó güei a tolos sectores implicaos para presenta-yos les llinies principales del proyectu ImpulSAD
  • Esta iniciativa pretende que los mayores residan na so redolada'l máximu tiempu posible, con calidá de vida y los cuidaos necesarios
  • 5.995 persones recibieron asistencia nos sos domicilios el pasáu xunetu, lo que supón 2.028 más que n'avientu de 2019

La Conseyería de Derechos Sociales y Bienestar presentó güei a conceyos, axentes sociales, empreses y profesionales el programa ImpulSAD, que se diseñó pa reforciar el sistema d'atención domiciliaria a la dependencia. El departamentu que dirixe Melania Álvarez convocó a tolos sectores implicaos para convida-yos a collaborar coles sos aportaciones na puesta en marcha de la iniciativa, que va desenvolvese nos dos años próximos.

Esti programa va aumentar la cuantía de les prestaciones económiques que reciben les persones dependientes, va ameyorar les condiciones llaborales de les auxiliares d'ayuda a domiciliu y va unificar los criterios d'accesu al sistema d'atención. Pa llograr estos oxetivos, van conformase distintos grupos de trabayu que van afondar en toes estes llinies. Tamién va llevase a cabu'l siguimientu de conclusiones y resultaos.  

La conseyera Melania Álvarez considera qu'esti programa ye imprescindible p’atender nos sos domicilios a les persones que la precisen. “Esta iniciativa garantiza que puedan siguir na so redolada'l mayor tiempu posible, con calidá de vida y recibiendo los cuidaos afayadizos”, precisó. 

Les previsiones apunten a que na próxima década'l númberu de persones con dalgún tipu de dependencia va aumentar n'Asturies alredor del 5 %. Por esta razón, la titular de Derechos Sociales apuesta por antemanase a esti escenariu “pa dar repuesta a tolos casos que puedan plantegase”. “Por eso trabayamos con toles partes implicaes, detectando problemes y dando soluciones”, añedió.

Mientres la so intervención, la conseyera tamién valoró'l “papel fundamental” de les muyeres que desenvuelven la so vida profesional nel ámbitu de los cuidaos y avanzó que'l programa ImpulSAD contempla la meyora de les condiciones llaborales de les auxiliares d'ayuda a domiciliu, de la que va fomentar la incorporación a estos llabores de persones que perciben una renta mínima. 

ImpulSAD refuercia'l plan de choque de dependencia que'l Principáu punxo en marcha en setiembre de 2019 y que dexó incrementar el númberu de persones atendíes nes sos cases nun 42,6 %, hasta llegar a les 5.995 persones en xunetu d'anguaño, lo que supón 2.028 más que n'avientu del 2019. Amás, esta midida amenorgó de forma sustancial les llistes d'espera, talmente qu’anguaño la mayoría de los espedientes tán resolviéndose en plazu.