Categories Navigation

Categories Navigation

Ponga acueye per tercer añu consecutivu los alcuentros estatales de vivienda compartida p’afitar población nel mediu rural asturianu

16/09/2021

 

  • Mientres les xornaes, que van celebrase del 20 al 23 de setiembre, van encarase propuestes de cohousing, salú y avieyamientu
  • Melania Álvarez, conseyera de Derechos Sociales: “queremos cases que dexen a les persones desenvolver una vida autónoma'l mayor tiempu posible”

La conseyera de Derechos Sociales y Bienestar, Melania Álvarez, presentó esta mañana los terceros alcuentros estatales d'espacios collaborativos. Nellos van encarar asuntos como les viviendes compartíes, l'avieyamientu, la salú, el cohousing y los viviendes pa tola vida. Too, cola mira d'ufiertar alternatives habitacionales que dexen afitar población nel mediu rural. 

Ponga acueye per tercer añu consecutivu estos alcuentros, promovíos pol conceyu y financiaos pola Dirección Xeneral de Vivienda, que van celebrase ente los díes 20 y 23 de setiembre. Va participar un bayurosu grupu d'espertos de primer nivel de distintos ámbitos (xurídicu, económicu, arquitectónicu, urbanísticu y sociolóxicu). Van cuntar tamién col testimoniu de profesionales implicaos nel desenvolvimientu de proyectos de cohousing a nivel nacional. 

“Asturies ye pionera nel abordaxe de la problemática relativa al hábitat, l'avieyamientu y la salú. L'apueste d'esti gobiernu ta dirixida a la promoción de viviendes que dexen la vida autónoma de les persones el mayor tiempu posible, adaptaos a les sos necesidaes vitales y tamién al desenvolvimientu de servicios complementarios asistenciales qu'ayuden a les persones mayores a poder siguir viviendo nes sos cases”, manifestó Melania Álvarez.

“Ye importante fomentar redes de collaboración ente instituciones competentes y ente entidaes públiques y privaes pa encarar el retu demográficu y contribuyir a la formación de profesionales y espertos nesti ámbitu”, añedió la conseyera.


 Declaraciones de la consejera de Derechos Sociales y Bienestar, Melania Álvarez (mp3: 616 Kb)