Categories Navigation

Categories Navigation

Formación Profesional estrena cursos d’especialización, cuatro titulaciones nueves y esámenes de recuperación en xunu

17/09/2021
  • Les clases de la modalidá presencial entamaron güei y el plazu de preinscripción va quedar abiertu hasta’l vienres 24


Les clases de Formación Profesional (FP) na modalidá presencial empecipiáron güei n'Asturies, nun cursu qu'incorpora importantes novedaes. Asina, amás, de la ufierta d'otres cuatro titulaciones –trés de nueva implantación y otra por adaptación- el Principáu empezó a impartir trés cursos distintos d'especialización, los conocíos como másteres de FP. Per otru llau, l'actualización de la resolución de la Conseyería d'Educación de 18 de xunu de 2009, que regula la organización y evaluación, dexa adelantrar la convocatoria estraordinaria de recuperación de setiembre a xunu.

El plazu de preinscripción de setiembre pa cursar un ciclu de FP va quedar abiertu hasta'l vienres día 24, polo qu'inda nun esisten datos oficiales de matrícula. Sicasí, nel periodu de solicitú de xunetu yá se rexistró una medría del alumnáu interesao nes enseñances profesionales. En concretu, la cifra de pidimientos de nuevu ingresu pasó de 7.802 l'añu pasáu a 8.287, un 6,2% más. La demanda creció tantu nos ciclos de grau mediu como nos de grau superior.

Los trés títulos de nueva implantación convirtiéronse nun revulsivu de la matrícula. Trátase de los siguientes: Técnicu Superior n'Animación 3D, Xuegos y Entornos Interactivos, que yá s'imparte nel Centru Integráu de Formación Profesional pa la Comunicación, Imaxe y Soníu (CIFP Cislan), de Llangréu; Técnicu Superior n'Enerxíes Renovables, que completa'l catálogu del CIFP de Caltenimientu y Servicios a la Producción, tamién en Llangréu, y Técnicu Superior n'Acondicionamientu Físicu, qu'ufierta'l CIFP del Deporte, n'Avilés. Per otra parte, el ciclu qu’afaya’l so decretu ye'l de Técnicu en Guía nel Mediu Natural y Mediu Monte, que va poder cursase en cuatro centros, asitiaos en Grau, L.lena, Xixón y Avilés.

La ufierta formativa incorpora trés cursos d'especialización, a los que puede aportase dende un ciclu formativu de grau superior o de grau mediu, d'un semestre de duración: el de Ciberseguridá n’Entornos de les Tecnoloxíes de la Información, nel CIFP Avilés; el de Dixitalización del Caltenimientu Industrial, nel CIFP de los Sectores Industrial y de Servicios La Llaboral; y el de Ciberseguridá n’Entornos de les Tecnoloxíes d'Operación, nel IES Fernández Vallín, de Xixón.
“Estos cursos quieren ser una actualización de los resultaos del aprendizaxe de los ciclos formativos, xeneralmente porque se rexistraron meyores tecnolóxiques importantes”, esplicó'l director xeneral d'Enseñances Profesionales, Javier Cueli.

Amás, est añu académicu entra a valir la reforma normativa qu'adelantra la convocatoria estraordinaria de recuperación a xunu. Esti cambéu introduzse p'ameyorar la organización de los centros y promover actividaes con docencia directa que faciliten l'aprendizaxe esi mes. Tamién va dexase que l'alumnáu inscritu en programes de FP dual qu'aprobara primero na convocatoria ordinaria puea incorporase a les empreses los meses de xunu y xunetu.

“Con esta actualización de la resolución de la Formación Profesional equiparámonos cola mayor parte de les comunidaes autónomes, nes que yá se ta faciendo d'esta manera”, argumentó Javier Cueli.

Presencialidá

Igual que les otres etapas, la FP recuperó la presencialidá y los centros cuntan con refuerzo docente covid pa encarar les necesidaes. Esti profesoráu fai posible’l desdoble o la codocencia naquellos módulos con dificultaes pa mantener la distancia de 1,2 metros ente estudiantes. Hasta agora, adjudicáronse 28 places con estes característiques y pa convocatorias de interinidad vinientes anunciáronse más.

La FP a distancia entama’l 1 de ochobre

Per otru llau, tamién s’introducieron novedaes normativas na FP a distancia, onde les clases empiecen el 4 d’ochobre.

La Conseyería d’Educación trata d’afayar la FP a distancia a la situación de 2021, cola actualización d’una resolución de 2004. La principal novedá ye que se tresformen en semipresenciales dalgunos módulos mui manipulativos, al considerar que nun se puen alcanzar toles competencies necesaries con una modalidá exclusivamente telemática.