• La directora xeneral d'Igualdá promueve un alcuerdu pa evitar la divulgación de cualquier información que facilite la reconocencia de les muyeres .
• Responsables de los principales medios y de les asociaciones de profesionales del Principáu soscriben la iniciativa.

El Gobiernu d'Asturies, los medios de comunicación qu'operen nel ámbitu xeográficu de la comunidá autónoma y les asociaciones de profesionales de la información del Principáu soscribieron güei un alcuerdu p’ ameyorar el tratamientu informativu de los casos de violación y agresiones sexuales. D'esta miente, responsables de los principales medios y asociaciones de profesionales firmaron un alcuerdu pol que se comprometen a evitar la divulgación de cualquier información o imáxenes que faciliten la identificación de les víctimes.

La directora xeneral d'Igualdá, Nuria Varela, promovió esta iniciativa, consciente del papel insustituible que los medios desempeñen na sociedá, y coles mires d’ameyorar el tratamientu informativu de los casos de violaciones y agresiones sexuales que dende'l pasáu payares atiende nel centru de crisis d'Uviéu. “La violencia sexual denúnciase bien poco, malapenes el 8 % de los casos y en parte porque les víctimes encaren en munchos casos una doble victimización. Con esti alcuerdu, queremos evitar esti dañu y avanzar nel cumplimientu de les directives europees qu'encamienten a protexer la intimidá de les víctimes pa evitar esa victimización secundaria, la intimidación o les represalies”, señaló Varela.

El compromisu sellóse güei nun actu públicu na sede de la Presidencia del Gobiernu d'Asturies nel que participaron representantes de trece medios asturianos, comprometíos pa evitar la divulgación de cualquier información que facilite la so identificación. “Cola distribución actual de la información de los medios de comunicación nes redes sociales, esti alcuerdu cobra especial importancia. Toi mui arguyosa d'esti compromisu de los medios de comunicación asturianos pa estremar los precuros y protexer a les víctimes”, resaltó la directora.

Asturies conviértese asina nuna referencia pal tratamientu informativu de los casos d'agresiones sexuales. “Quiero estimar a los periódicos El Comercio, La Nueva España, La Voz de Avilés, La Voz de Asturias y La Voz del Trubia; a les cadenes de radio Onda Cero, Cope, Radio Asturias-Cadena Ser, RNE y RPA; a les televisiones públiques qu'operen nel Principáu, TVE y TPA, y a Canal 10 Televisión; a les axencies de noticies EFE y Europa Press; a l'Asociación de la Prensa d'Uviéu y al Colexu Profesional de Periodistes d'Asturies la so presencia nesti actu y el so compromisu con una información honesta, veraz y rigorosa, alloñada de sensacionalismos que puen facer bien de dañu a les víctimes”, destacó Varela.

Amás, dende la Dirección Xeneral d'Igualdá anímase a tolos medios asturianos a sumase a esti alcuerdu, que va siguir abiertu pa la incorporación de toos aquellos qu'operen nel Principáu y asuman el compromisu.

Declaraciones de la Directora General de Igualdad (mp3: 425 Kb)