Categories Navigation

Categories Navigation

Educación incorpora a 80 auxiliares de conversación como refuerzu pa la enseñanza de llingües estranxeres en 135 centros

01/10/2021

  • El director xeneral d'Ordenación destaca que la so xera “va contribuyir a aumentar la competencia oral del alumnáu”.

La Conseyería d'Educación entamó esta tarde una xornada d'acoyida pa los 80 auxiliares de conversación nativos que van apoyar la enseñanza de distintes llingües estranxeres en 135 centros sosteníos con fondos públicos esti cursu.

El director xeneral d'Ordenación, Evaluación y Equidá Educativa, David Artime, dio la bienllegada, de forma telemática, a estos profesionales docentes y destacó la importancia de la so xera, que “va contribuyir de forma sustancial a impulsar la enseñanza d'idiomes dende'l sistema educativu y a aumentar la competencia oral del alumnáu”.

Artime señaló qu'esti ye unu de los programes más demandaos ente la comunidá educativa. “Ye una iniciativa que va más allá de la mesma meyora de la competencia comunicativa. Incorporar a les aules a estos profesionales ye arriquecedor, al tresmitir les sos tradiciones y costumes y al facilitar l'acercamientu a los aspectos sociales y económicos del so país d'orixe. Ye una motivación pal aprendimientu d'una llingua estranxera”, añedió.

Los 80 auxiliares de conversación vienen de 9 países, 71 son nativos n'inglés, ocho en francés y unu n'alemán. El so llabor va consistir en realizar llabores d’apoyu nos centros, con un horariu compartíu ente dalgunos d'ellos. La carga llectiva va repartise en 54 colexos públicos, 62 institutos y 19 centros concertaos.

La incorporación a les aules d'estos profesionales articúlase de trés maneres distintes. Una parte contrátase directamente pol Gobiernu d’Asturies. Amás, existe una subvención a la Comisión Fulbright d'Intercambiu Cultural, Educativu y Científicu ente España y Estaos Xuníos. El restu procede del programa impulsáu pol Ministeriu d'Educación y Formación Profesional.


Declaraciones del Director3: 693 Kb)