Categories Navigation

Categories Navigation

El XX Premiu Emilio Alarcos de Poesía va fallase esti martes n’Uviéu

04/10/2021

  • El gallardón va conocese nun actu entamáu pa presentar les obres ganadores de les ediciones del 2019 y 2020.

La conseyera de Cultura, Política Llingüística y Turismu, Berta Piñán, va presidir esti martes, 5 d’ochobre, a les 19:00 hores, nel Palaciu Conde de Toreno d’Uviéu, un actu onde se van presentar les obres ganadores del Premiu Emilio Alarcos de Poesía nes ediciones del 2019 y 2020: El reloj de Mallory, de David Hernández Sevillano, y Cuerpos de Cristo, d’Antonio Praena Segura. L’encargáu de la introducción va ser l’escritor y críticu lliterariu José Luis García Martín.

A lo llargo de l’actividá tamién se va dar a conocer el fallu del xuráu de la ventésima edición d’esti gallardón y, depués, los escritores Luis Alberto de Cuenca, José Luis García Martín, Aurora Luque, Josefina Alarcos y Olvido García Valdés van ufiertar un recital poéticu.

El premiu que lleva’l nome del catedráticu de la Universidá d’Uviéu Emilio Alarcos Llorach (Salamanca, 1922 - Uviéu, 1998) creóse nel 2002 pola Conseyería de Cultura, Política Llingüística y Turismu coles mires de premiar poemarios orixinales y inéditos escritos en castellanu. Ta dotáu con 6.000 euros, amás de la publicación de la obra ganadora.