Categories Navigation

Categories Navigation

El Gobiernu d'Asturies celebra mañana'l Día Mundial de les Aves con una visita guiada pela ría de Villaviciosa

04/10/2021

  • L'itinerariu va centrase na marxe esquierda del estuariu y va incluyir los trés principales puntos d'observación: el centru d'interpretación, El Puntal y el Cierrón.

La Rede Natural d'Asturies entama mañana visites guiaes na Reserva Natural de la Ría de Villaviciosa por cuenta de la conmemoración del Día Mundial de les Aves. La salida va facese a les 10:30 hores dende'l centru d'interpretación d'esti paisaxe protexíu.

L'itinerariu va centrase na marxe esquierda del estuariu y va incluyir los trés principales puntos d'observación de la reserva: el centru d'interpretación, El Puntal y el Cierrón. L'actividá, de calter gratuitu y empobinada a tolos públicos, busca dar a conocer la importancia de la ría y de los trés principales ecosistemes que conformen el so paisaxe: la desembocadura, la marisma y el terrenu baxu, asociando a caúnu d'ellos un tipu específicu d'aves.

Les persones interesaes en participar puen acutar plaza nel teléfonu 610 543 522.

La ría de Villaviciosa ye, xunto cola del Eo, unu de los dos estuarios asturianos que formen parte de los 74 incluyíos n'España na Convención Relativa a los Humedales d'Importancia Internacional (conveniu de Ramsar). La misión d'esta convención ye'l caltenimientu y l'usu racional d'estos llugares, como contribución al llogru d'un desenvolvimientu sostenible en tol mundu, por aciu acciones locales y nacionales y gracies a la cooperación internacional.

En Villaviciosa ye posible ver más de 2.500 aves a lo llargo de tol añu, con especies tan característiques como l'andarríos chicu, el zarapitu real o l’águila pescadora, polo que constituye unu de los hábitats húmedos con más variedá de tol norte peninsular.


Declaraciones del Director General del Medio Natural, David Villar (mp3: 262 Kb)

Díptico del evento (pdf: 6073 Kb)