Categories Navigation

Categories Navigation

El Principáu destina 3,6 millones a impulsar l'alministración centrada nel datu, una de les claves de la modernización dixital

04/10/2021
  • El suministru y caltenimientu de llicencies informátiques va dexar realizar análisis de los procesos y del big data pa ufiertar a la ciudadanía meyores servicios, más rápidos y seguros.

El Gobiernu d'Asturies va destinar 3,6 millones al suministru y caltenimientu de llicencies informátiques por un periodu de dos años. Esti contratu ye clave pa impulsar la modernización dixital de l'Alministración autonómica, unu de los grandes retos de la Conseyería de Presidencia pa esta llexislatura.

El saltu que supón el pasu d'una alministración centrada nel espediente a otra basada nos datos, que dexe tomar meyores decisiones y emprestar un serviciu públicu de mayor calidá, fai necesaria la contratación de les llicencies que faciliten la xestión de les bases de datos. Xunto con otres iniciatives de tresformación dixital, esti cambéu va dexar ufiertar una atención más eficiente, sobre manera nos ámbitos de la salú, los servicios sociales, la educación y la tramitación alministrativa.

Esti usu de les nueves tecnoloxíes impulsa y acompaña la evolución de la sociedá, mesmo que la relación ente l'Alministración y la ciudadanía. Esto implica una tresformación nel paradigma de los procedimientos alministrativos: el pasu d'un modelu de tramitación d'espedientes a otru de serviciu públicu.

Nesti sentíu, el Principáu plantégase'l retu de tresformar l'Alministración nuna plataforma de servicios dixitales que facilite l'accesibilidá al traviés de medios electrónicos más eficientes, rápidos y seguros.

L'Executivu autonómicu tamién aprobó apocayá un gastu de 314.600 euros pa reforzar los servicios de seguridá informática énte posibles ciberataques.