Categories Navigation

Categories Navigation

Los centros de tecnificación del Gobiernu d’Asturies acueyen esti cursu 43 deportistes d’altu rindimientu

05/10/2021

  • El programa junior femenín intégrase pela primer vez nel CDT de Piragüismu, en Corvera.
  • El Principáu aspira a caltener l’equipamientu d’El Cristo como referencia nacional y internacional pa bádminton.

Los centros de tecnificación deportiva (CTD) del Gobiernu d’Asturies acueyen esti cursu 43 deportistes d’altu rindimientu de les disciplines de natación, bádminton y piragüismu nes instalaciones de Tresona (Corvera) y El Cristo (Uviéu), según informó güei la directora xeneral de Deporte, Beatriz Álvarez Mesa, nel actu de presentación del añu académicu nuevu, onde tuvo acompañada pol tutor del alumnáu, Francisco Rionda.

Los estudiantes becaos, que vienen d’ocho comunidaes (Asturies, Galicia, Cantabria, Navarra, Castiella y Llión, Baleares, Andalucía y Comunidá Valenciana), tienen la consideración de deportistes d’altu rindimientu y tán incluyíos nos planes de tecnificación de les sos respectives federaciones nacionales. L’ayuda que disfruten nel Principáu ta sometida a siguimientu deportivu y académicu, polo que quien cursen enseñanza media tienen que superar el cursu pa siguir nel programa.

Nel actu celebráu esta tarde en Tresona, la directora xeneral de Deporte anunció les novedaes pa esti cursu, ente les que destaca l’apueste de la Conseyería de Cultura, Política Llingüística y Turismu pola igualdá d’oportunidaes, al integrar en Tresona, la primer vez, el programa de tecnificación deportiva junior femenín en piragüismu, que se suma asina al exitosu junior masculín.

Per otra parte, el Principáu aspira a caltener el centru d’El Cristo como referencia a nivel nacional y internacional pa bádminton, polo que solicitó al Conseyu Superior de Deportes la calificación del programa de tecnificación, cola mira de siguir apurriendo los xugadores a los grupos de trabayu y selecciones nacionales sub 15, 17, 19 y absoluta. Con esta recalificación, que va dexar poner en marcha esti cursu’l programa que yá se llevó a cabu n’Asturies hasta’l 2018, la Dirección Xeneral de Deporte da un impulsu nuevu a deportistes d’éxitu reconocíu nesta modalidá.

 

Éxitos deportivos y académicos

Álvarez tamién valoró los resultaos llograos nel últimu cursu, tanto nel planu deportivu como nel académicu, y comprometióse a impulsar el programa Paideia d’estensión cultural, amenorgáu esti exerciciu de resultes de la crisis sanitaria.

L’añu académicu pasáu, los piragüistas sacaron 36 medayes nos campeonatos d’España (10 oros, 12 plates y 14 bronces), 4 medayes de plata nos d’Europa y 7 nos del mundu (4 oros y 3 plates).

Pela so parte, los nadadores llevaron 19 medayes en campeonatos nacionales y 5 d’ellos participaron n’actividaes del equipu nacional del programa olímpicu 2024.

Amás, los y les xugadores de bádminton que s’incorporen al programa de tecnificación llograron la pasada temporada 15 medayes nos campeonatos d’España y 7 foron convocaos pola selección española pa los d’Europa y del mundu.