• La detección de contaxos obliga a zarrar el 0,05 % de les unidaes y a confinar al 0,06 % del alumnáu
• S​​​​​​​alú notificó 14 positivos por coronavirus na comunidá educativa ente’l 5 y el 11 d’ochobre

Asturies rexistró dende’l 5 d’ochobre hasta ayeri un total de 4 aules y 89 estudiantes confinaos pola incidencia del coronavirus nos centros educativos públicos, concertaos y privaos, incluyíes les escueles de 0 a 3 años.

Esto supón que les autoridaes sanitaries decidieron aislar el 0,05 % de les 6.695 clases abiertes na comunidá y al 0,06 % del alumnáu matriculao (137.500) dende’l primer ciclu d’Infantil hasta Bachilleratu y Formación Profesional (FP).

A lo llargo de la selmana, la Conseyería de Salú notificó 14 positivos por covid dientro de la comunidá educativa: toos ellos ente l’alumnáu.

Igual que’l cursu pasáu, los procedimientos que se ponen en marcha énte la detección de positivos de coronavirus vinculaos a centros educativos tán recoyíos na Guía d’actuación énte l’apaición de casos de covid-19, ellaborada pola Dirección Xeneral de Salú Pública y el Serviciu de Salú del Principáu (Sespa) y actualizada el 17 de setiembre. Esti documentu ta a disposición de tola comunidá educativa na web Educastur.

La guía, que s’atopa en revisión de contino p’afacese a la evolución de la pandemia, recueye tola información necesaria, dende los confinamientos a la regulación de los grupos de convivencia estable y la xestión de posibles brotos. ​

Listado de Centros con Incidencias (pdf: 185 Kb)