• Espacio Psico incluye acciones informatives y la puesta en marcha d'un apartáu específicu na so páxina web.
• L’estrés llaboral, la violencia física, l'acosu y el mobbing son dalgunos de los factores causantes d'accidentes a los que pue tar espuestu cualquier trabayador.

L'Institutu Asturianu de Prevención de Riesgos Llaborales (IAPRL) llanza Espacio Psico, una plataforma qu'ayuda a xestionar los riesgos psicosociales n’ámbitu llaboral. Esti organismu, en collaboración colos axentes sociales, creó esti espaciu pa emprestar una atención especial a la xestión de los riesgos psicosociales, esto ye, aquellos rellacionaos cola organización del trabayu y les rellaciones nesti entornu.

Esta plataforma incluye una serie d'acciones informatives, d'asesoramientu y consulta, a les que pue aportase al traviés de la web del IAPRL y d’un microsite específicu nos enllaces www.iaprl.org y https://cutt.ly/0E4D3OZ.

Nesi espaciu incluyóse un formulariu pa consulta y solicitú d'asesoramientu. L'oxetivu final ye encarar dende diverses perspectives una situación agravada pola pandemia. Tamién s'ellaboraron seis píldores audiovisuales, publicaes na web, que busquen ayudar a identificar los riesgos psicosociales a empreses y trabayadores.

Los factores de riesgu psicosocial tán presentes en toles organizaciones y son aquellos rellacionaos cola forma de programar, diseñar y estructurar el trabayu, asina como cola propia xestión de la empresa y los contestos sociales que s'establecen nel trabayu. Estos factores, mal llevaos, puen derivar en riesgos pa la salú física y mental de les persones trabayadores, y causen numberosos accidentes y incidentes.

Estos factores de riesgu afecten a trabayadores de tolos sectores d'actividá y la so identificación y evaluación ye fundamental pa poder intervenir sobre ellos.

Estrés llaboral, violencia física, acosu sexual o por razón de sexu y acosu sicolóxicu o mobbing son dalgunos de los riesgos sicosociales a los que tou trabayador pue tar espuestu.

Según la Llei de Prevención de Riesgos Llaborales, les empreses tienen la obligación d'evaluar esos riesgos y establecer midíes preventives pa esanicialos o amenorgalos.

Declaraciones de la Directora del Instituto Asturiano de Prevención de Riesgos Laborales, Miryam Hernández (mp3: 570 Kb)