• ​​​​Dambes infraestructures sumen un presupuestu de  más de 12,35 millones

La Conseyería d’Educación acaba d’axudicar el contratu de rehabilitación parcial y edificación nueva del IES Rei Pelayo de Cangues d’Onís y tamién la construcción del IES de La Florida, n’Uviéu. Dambes infraestructures sumen un presupuestu de más de 12,35 millones. Amás, el procedimientu del futuru institutu de La Corredoria entró tamién na recta final.

La conseyera d’Educación, Lydia Espina, firmó esta selmana l’axudicación de les obres del IES Rei Pelayo a la empresa Construcciones y Promociones Coprosa S. A. L’importe xube a 4.922.665,13 euros y el plazu d’execución de los trabayos va allargase 16 meses.

El proyectu incluye la rehabilitación parcial del edificiu actual y la construcción d’un bloque complementariu nuevu. Amás, busca la integración cola redolada, con materiales de piedra y madera y acristalamientos. El diseñu foi certificáu pol organismu GBCE col sellu de 4 fueyes verdes, lo qu’implica que tanto los materiales como les instalaciones son afayadizos p’aforrar enerxía, amenorgar les emisiones y curiar del mediu ambiente. El financiamientu inclúyese nel programa operativu Feder d’Asturies 2014-2020.

La conseyera tamién firmó l’axudicación del proyectu de construcción del IES de La Florida a la UTE formada por Terra Ingenieros S. L., Construcciones Alea S. L. y Proforma Ejecución de Obras y Restauraciones S. L., por un importe de 7.435.822,22 euros. El plazu d’execución va allargase 18 meses.    

Esti institutu, que tamién va recibir financiamientu del fondu Feder, va tener 18 unidaes, 12 aules d’ESO, otres 6 de Bachilleratu y una pista deportiva. La creación del equipamientu va dexar implantar la ufierta d’Educación Secundaria Obligatoria (ESO) y Bachilleratu nesti barriu uviedín n’espansión, qu’agora nun tien institutu propiu. Na actualidá, l’IES más averáu ye’l de La Iría.