• ​​​​​​​El modelu va tar basáu nos resultaos obteníos nel proyectu pilotu de la cuenca del Nalón-Narcea y nos estudios realizaos por espertos nos últimos años
• L’Executivu propón cambeos reglamentarios pa permitir la celebración, pela primer vez n’Asturies, del Campeonatu Mundial de Pesca Deportiva
• El Conseyu de la Pesca analiza la normativa pal 2022, que presenta una mengua progresiva de la presión piscícola

 
El Gobiernu d’Asturies va poner en marcha un plan integral de xestión de los ecosistemes acuáticos, que va incluyir un programa específicu pal salmón. El modelu nuevu va adaptase por cuenques fluviales y va tar basáu nos resultaos sacaos nel proyectu pilotu puestu en marcha anguaño na cuenca del Nalón-Narcea, amás de nos estudios realizaos por espertos nos últimos años.
 
El proyectu pilotu, una iniciativa liderada pol grupu d’acción local del baxu Nalón nel marcu d’un proyectu de cooperación del programa Leader, va valir pa desenvolver les bases metodolóxiques y establecer una llende de caltenimientu favorable nes poblaciones de salmón atlánticu. A esto súmase la documentación que foi atropando’l personal técnico de la Dirección Xeneral del Mediu Natural y Planificación Rural, un trabayu nel que participaron espertos d’otres comunidaes y instituciones como la Universidá d’Uviéu.
 
Los datos, qu’axunten tolos estudios sobre’l salmón realizaos nes últimes décades, combinaos cola metodoloxía del proyectu pilotu, van dexar desplegar un marcu llegal pa definir una xestión sostenible del recursu. Pa eso, van usase ferramientes como la monitorización siguida o l’usu de modelos predictivos y va dase prioridá al caltenimientu y la viabilidá de les poblaciones al plazu llargu.
 
Esta foi una de les cuestiones sobre les qu’informó güei’l director xeneral del Mediu Natural y Planificación Rural, David Villar, na xunta del Conseyu de Pesca. Villar tamién anunció que na seronda del añu que vien Asturies va acoyer, pela primer vez, el Campeonatu Mundial de Pesca Deportiva, entamáu pola Federación Española de Pesca y Casting y la Federación Internacional de Pesca con Mosca. Va ser, amás, la primer edición celebrada n’España d’esta competición tan importante, que va axuntar a más de 300 deportistes de tol mundu. Vinculada a esti campeonatu tamién se va desenvolver una convención onde se van tratar aspectos rellacionaos cola pesca, los ríos y el caltenimientu del ecosistema fluvial, que va cuntar cola presencia d’espertos nacionales y internacionales.
 
El Principáu propunxo modificar un conxuntu de normatives na temporada 2022 pa poder celebrar esti eventu. La propuesta va afectar a dellos tramos de los principales ríos trucheros d’Asturies cola mira d’habilitalos pa la pesca ensin muerte y celebrar asina esta cita deportiva.
 
El Conseyu de Pesca tamién analizó la normativa que va rexir la pesca fluvial nel 2022, que propón una mengua global de la presión, de manera progresiva y con alternatives por zones y artes. Nel casu del salmón, el cupu baxa de cuatro a trés captures por pescador y temporada y incluye una limitación temporal p’ameyorar el tránsitu de la especie ríu arriba. Al respective de la trucha común y el reu, el máximu queda afitáu en cinco exemplares por pescador y día, ún menos que na campaña pasada. Amás, el Río Nalón va pasar a cuntar nel so tramu baxu con cuatro cotos parciales, que sustituyen a tramos llibres, pa menguar la presión piscícola.
 
Tocante a les artes y cebos, va dexase l’usu de piscardu muertu en tramos de cotu cola mira de favorecer la pesca de truches de gran tamañu, exemplares que depreden esguinos (alevinos) de salmón y otres truches más pequeñes. Tamién se dexa usar la cuyarina pa la pesca ensin muerte, siempre y cuando s’aplique con un solu anzuelu desprovistu de galla.
 
En cuanto al periodu hábil de pesca pal 2022, propónse caltener les feches, de manera que la temporada de trucha, reu y otres especies va desenvolvese dende’l tercer domingu de marzu hasta’l 15 d’agostu.
 
Pela so parte, el salmón va poder pescase ente’l 21 de marzu y el 31 de xunetu:

•  Ensin muerte: del 21 de marzu al 10 d’abril y del 16 al 31 de xunetu, sacante nes zones limítrofes de los ríos Eo y Deva.
• Con muerte: del 11 d’abril al 15 de xunetu.​​​​​​​ ​​​​​​

Declaraciones del Director General del Medio Natural y Planificación Rural, David Villar (mp3: 615 Kb)