Categories Navigation

Categories Navigation

La Conseyería de Presidencia convoca la selección de representantes pal Foru de Gobiernu Abiertu y el Conseyu pa l'Axenda 2030

26/10/2021
  • Les entidaes privaes ensin ánimu d'arriquecimientu interesaes yá puen presentar les sos candidatures dende güei y mientres 15 díes hábiles

La Conseyería de Presidencia, al traviés de la Dirección Xeneral de Gobernanza Pública, Tresparencia, Participación Ciudadana y Axenda 2030, convocó la selección de representantes pal Foru de Gobiernu Abiertu y el Conseyu pa l'Axenda 2030.

D’alcuerdu cola convocatoria publicada ayeri nel Boletín Oficial del Principáu d'Asturies, puen participar les entidaes privaes ensin ánimu d'arriquecimientu y con personalidá xurídica propia que cumplan los requisitos señalaos nes bases y presenten la so candidatura xunto cola documentación riquida. El plazu ye de quince díes hábiles dende güei.

Ente los criterios de baremación ta la implantación y nivel de representatividá de la entidá, l'antigüedá, el grau de conexón colos oxetivos, compromisos y actividaes del foru o del conseyu y el númberu d'actividaes o proyectos rellacionaos col Gobiernu Abiertu o l'Axenda 2030 nes que participaron nos trés años últimos.

Les candidatures van ser baremaes por una comisión de valoración presidida pol director xeneral de Gobernanza Pública, Tresparencia, Participación Ciudadana y Axenda 2030, José Antonio Garmón.

El Foru de Gobiernu Abiertu pretende incrementar la collaboración y el fortalecimientu del diálogu permanente ente l'Alministración del Principáu d'Asturies y la sociedá civil en materies rellacionaes cola collaboración, la tresparencia, la participación, la rindición de cuentes y la innovación tecnolóxica  coles mires d'ameyorar la calidá de la democracia y xenerar un mayor enfotu de la ciudadanía nes instituciones públiques.

Pela so parte el Conseyu pa l'Axenda 2030 ye un órganu colexáu de consulta y participación, que busca emprestar asesoramientu y favorecer la collaboración ente l'Alministración del Principáu d'Asturies y la sociedá civil pal cumplimientu de los Oxetivos de Desenvolvimientu Sostenible (ODS) conteníos na Axenda 2030, la fueya de ruta pa un mundu más sostenible y más xustu, aprobada pola ONU. 

 “Con estos dos órganos el Principáu d'Asturies dótase d’espacios nuevos pa la participación que van dexanos conocer de primera mano la opinión de la sociedá asturiana ameyorando asina la calidá de les nuestres instituciones y facilitando’l llogru de los Oxetivos de Desenvolvimientu Sostenible de l'Axenda 2030” señaló la conseyera de Presidencia Rita Camblor.​​​​​​