Categories Navigation

Categories Navigation

La Biblioteca d’ Asturies acueye una esposición sobre Emilia Pardo Bazán

27/10/2021

​​​​​​​El Director General de Cultura y Patrimonio, Pablo León Gasalla, (izqda.) y el director de la Biblioteca de Asturias Ramón Pérez de Ayala,  Juan Miguel Menéndez Llana

  • La muestra, entamada con motivu del Día de les Biblioteques, va poder visitase hasta'l 21 de payares y recueye los llazos de la escritora gallega con destacaos escritores y personaxes asturianos del so tiempu .

El director xeneral de Cultura y Patrimoniu, Pablo León Gasalla, , presentó esta mañana l'amuesa bibliográfica Emilia Pardo Bazán y Asturias, qu'entama la Biblioteca d'Asturies Ramón Pérez de Ayala coincidiendo cola celebración del Día de les Biblioteques y con motivu del centenariu del fallecimientu de la escritora gallega. La esposición va caltenese abierta al públicu hasta'l 21 de payares.

León esplicó que'l principal oxetivu d'esta esposición, qu'axunta les obres más destacaes de Pardo Bazán existentes na colección bibliográfica de la biblioteca, ye facer visibles los llazos, dacuando esporádicos, llonxanos o anecdóticos, y les relaciones, d'amistá, yá seyan profesionales o circunstanciales, qu'existieron ente l'autora y destacaos escritores y personaxes asturianos del so tiempu.

Estos fueron más intensos nunos casos que n'otros y de bien variáu signu, como nel casu de Leopoldo Alas Clarín, Ramón de Campoamor, Armando Palacio Valdés, Rafael María de Labra, Aniceto Sela, Eva Canel, Rosario Acuña, Félix Cuquerella, Andrés González Blanco, José María del Busto, José Fernández Cuevas o Ramón Pérez de Ayala.

Ente los materiales presentaos na amuesa atópense diverses ediciones de les obres de Pardo Bazán, munches d'elles primeres ediciones, memos qu’una selección de llibros, revistes, ilustraciones, partitures, manuscritos y correspondencia de los autores asturianos, onde puede comprobase la relación que caltuvieron con ella.

Emilia Pardo-Bazán y de la Rúa-Figueroa, o a cencielles Emilia Pardo Bazán (A Coruña 1851- Madrid 1921), condesa de Pardo Bazán, foi novelista, periodista, feminista, ensayista, crítica lliteraria, poeta, dramaturga, traductora, editora, caderalga y conferenciante española, a quien se debe en gran midida la introducción del Naturalismu n'España. Precursora nes sos idees sobre los derechos de les muyeres y el feminismu, reivindicó la instrucción femenina y dedicó una parte importante de la so actuación pública a defender estes idees.

Ente los sos más de 600 obres destaquen Los palacios de Ulloa (1886), una de les cumes de la novelística del sieglu XIX y la so creación más famosa, que reflexa con almirable realismu la decadencia del mundu rural gallegu al traviés d'unos personaxes primitivos sometíos al instintu; La cuestión palpitante (1883), una escoyeta d'artículos que lu acrediten como una de les impulsoras del Naturalismu n'España, y La Tribuna (1883), considerada la primer novela social española, onde incorpora per primer veza al proletariáu y da voz y discursu propiu a una muyer trabayadora: Amparo, la cigarrera.

Tamién ye destacable el so trabayu d'estudiu y crítica lliteraria, realizáu por aciu les sos numberoses collaboraciones en prensa y, cuantimás nel Nuevo Teatro Crítico, publicación periódica qu'ella mesma financió, dirixió y escribió íntegramente.