Categories Navigation

Categories Navigation

Los gobiernos d’Asturies, Galicia, Cantabria y Castilla y Llión constituyen un grupo técnicu de trabayu sobre la xestión del llobu ibéricu

28/10/2021

​​​​​​​de izquierda a derecha, el director general del Medio Natural y Planificación Rural del Gobierno del Principado de Asturias, David Villar; el director general de Patrimonio Natural y Política Forestal de la Consejería de Fomento y Medio Ambiente de Castilla y León, José Ángel Arranz, la directora general de Patrimonio Natural de la Xunta de Galicia, Belén do Campo, y el director general de Biodiversidad, Medio Ambiente y Cambio Climático del Gobierno de Cantabria, Antonio Lucio

  • L'oxetivu ye sirvir de puntu d'alcuentru ente les comunidaes autónomes qu'alluguen el 95% de la población d'esta especie pa compartir el conoci,ientu, los datos y esperiencies acumulaes y proponer actuaciones de forma conxunta.
  • Les cuatro rexones alcuerden nun participar entá nes xuntes técniques del ministeriu, en desalcuerdu cola ellaboración de la nueva estratexa .

Los gobiernos d'Asturies, Galicia, Cantabria y Castiella y Llión constituyeron güei un grupu técnicu de trabayu sobre la xestión del llobu ibéricu nel noroeste de la península que naz coles mires de sirvir de puntu d'alcuentru ente territorios con presencia siguida de la especie nes últimes décades. El foru va dexar compartir el conocimientu acumuláu y les esperiencies de más de 20 años de xestión de la especie, coordinar acciones d'estima poblacional de manera efectiva y emitir criterios científico-técnicos.

El director xeneral del Mediu Natural y Planificación Rural, David Villar, participó na xunta celebrada en Llión colos sos homólogos de Galicia, Cantabria y Castiella y Llión, na que yá se punxeron de mancomún los trabayos realizaos añalmente nel Parque Nacional de los Picos d'Europa dende fai 20 años; los cálculos poblacionales añales desenvueltes n'Asturies, qu'inclúin radio-siguimientu con XPS pa meyora de conocimientu del comportamientu de la especie, y les campañes d'estimes y censos desenvueltos en Galicia y Castiella Llión.

Al allugar les cuatro comunidaes autónomes más del 95% de la población de llobu ibéricu, son miles los datos recoyíos de muestres, estudios veterinarios y analises de restos, en collaboración con instituciones universitaries o investigadores que xeneraron artículos científicos d'importante caláu.

L'estudiu conxuntu de toa esta información ye fundamental pa conocer l'estáu de caltenimientu d'una especie, como asocede colos trabayos rellacionaos col osu pardu cantábricu, realizaos colos recursos propios d'estes mesmes comunidaes nel marcu d'otros planes o programes, que cunten con una gran solidez nos sos resultaos.

Poro, na sesión d'esta mañana alcordóse ellaborar, de primeres, un censu coordináu de llobu ibéricu nestos territorios pa conocer el verdaderu estáu de caltenimientu de la especie, siguiendo l'actuación respaldada pola Comisión Europea, al traviés de la Directiva Hábitats, qu'encamienta a los Estaos miembros a esi primer pasu enantes de cualesquier otra midida.

El grupu de trabayu tamién amosó'l so desalcuerdu cola dinámica de la ellaboración de la nueva Estratexa pal caltenimientu del llobu n'España, polo que, entá, nun van participar nes xuntes técniques del ministeriu. Nesti sentíu, treslladarán-y directamente la posición conxunta que derive de les actuaciones del grupu de trabayu constituyíu güei.

Asturies sigue trabayando intensamente nel ámbitu de les sos competencies, en cumplimientu de toles llinies recoyíes nel Plan de xestión del llobu, sacante nos controles poblacionales que fueron suspendíos temporalmente hasta que se disponga de seguridá xurídica.