Categories Navigation

Categories Navigation

Patrimonio Cultural entama los trámites pa incluyir nel so inventariu trés castros localizaos de recién: La Talaya, en Sotu’l Barcu; Vil.lar de Vildas, en Somiedu, y Castiello, en Llanera

28/10/2021

​​​​​​​La consejera de Cultura Berta Piñán y el director general de Cultura y Patrimonio, Pablo León

  • La declaración de Bien d'Interés Cultural de la ilesia de San Pedro d’Arroxo, en Quirós, recibe lluz verde a la espera del correspondiente decretu del Conseyu de Gobiernu.
  • L'órganu tamién da'l vistu bonu al proyectu d'execución de drenaxes y obres d'afitamientu de restos arqueolóxicos nel castru de la Campa Torres de Xixón.

El plenu del Conseyu de Patrimoniu Cultural, presidíu pola conseyera Berta Piñán, alcordó güei l'entamu de los trámites d'inclusión de trés castros identificaos apocayá nel Inventariu del Patrimoniu Cutural.

El primeru d'ellos ye'l castru alcontráu en La Talaya, en Sotu'l Barcu. El yacimientu ta allugáu nuna amplia llomba de superficie amesetada y cuenta con dos estructures anulares concéntriques y de planta ovalada, en claru contraste col restu de les morfoloxíes agraries circundantes. Cuenta, amás, con turries de tierra de ciertu valumbu, con fosos colmataos a los sos pies.

El segundu castru ye l'alcontráu n'El Cuetu Tablau, en Vil.lar de Vildas (Somiedu), qu'ocupa un cuetu pequeñu cónicu sobro la marxe esquierda del ríu Pigüeña, na base de la lladera que baxa de la sierra de Cereizales. Nesti yacimientu atopóse un fosu natural sobre'l que se llevanta una turria vertical que cubre tol so frente, con un altor de cuatro a cinco metros, y enllárgase de forma narquiada pel costáu sur del cuetu hasta algamar un llargor d'unos 150 metros. Esta turria remata tol so percorríu nuna escampada de cuatro a seis metros d'anchu que tuvo d'acoyer la principal zona d'hábitat. Percima, defínese una nueva plataforma con un cursu paralelu y tres la que'l cuetu remata, metros más arriba, nun cumal arrondáu güei ocupáu por arboláu. A lo llargo de la lladera, paez que dambes terraces taben xuníes por una rampla oblicua.

El tercer castru atópase na aldega de Castiello, en Villardebeyo (Llanera). Asítiase nuna llomba arrondada qu'apodera la redolada circundante. Un cambéu de nivel arrodia en corona la zona culminante del cuetu. Esi pasu representa una turria de casi dos metros d'altor con un rellanu que puede atribuyise a un fosu colmatáu. Na lladera oriental, fuera de la parcela nuclear, estrémase una turria rellacionada col castru, que completa'l sistema defensivu. El recintu muestra una forma ovalada de superficie llixeramente abombada.

Otres decisiones adoptaes fueron les siguientes:

  • El Conseyu de Patrimoniu dio lluz verde tamién al informe final relativu a la declaración como Bien d'Interés Cultural la ilesia de San Pedro d’Arroxo, en Quirós. L'últimu pasu va ser l'aprobación del decretu correspondiente per parte del Conseyu de Gobiernu. La ilesia de San Pedro d’Arroxo ye un templu románicu construyíu nel primer terciu del sieglu XIII sobre un edificiu anterior del que se caltienen restos sol ábside actual. Cuenta con una rica decoración escultórica en capiteles y modillones, mesmo que con pintures murales del sieglu XVII. Destaca la so complicada historia, dada la inestabilidá del terrén sobre'l que s'asitia, que determinó un procesu de fundimientu del ábside yá constatáu en 1792 por Xovellanos y que terminó na ruina del edificiu nel sieglu XIX. Foi restaurada en 1940 y en 1989 realizáronse obres d'afitamientu, persistiendo na actualidá los problemes d'estabilidá qu'aquexen al edificiu dende'l so orixe.
  • El Conseyu dio'l vistu bonu a la tramitación pa modificar dellos decretos de declaración como Bien d'Interés Cultural diversos conxuntos históricos. L'oxetivu ye incorporar nel inventariu una serie d'obres ya intervenciones suxetes a determinaes condiciones técniques que tienen de valorar los conceyos. D'esta manera, va entainase la emisión d'informes de calter patrimonial ensin menospreciar la supervisión d'intervenciones que garanticen la preservación de los sos valores culturales. Los conxuntos afectaos son los de Llanes, Ribesella, Tazones (Villaviciosa), Salas, Cuideiru y Cangas del Narcea.

El Conseyu del Patrimoniu Cultural tamién informó de forma favorable un proyectu del Conceyu de Xixón pa executar obres de drenaxe nel área del yacimientu de la Campa Torres conocida como La Llanada, suxeta a frecuentes inundaciones que menosprecien el caltenimientu de les muertes arqueolóxiques. L'actuación inclúi estudios xeofísicos na zona, trabayos arqueolóxicos pa l'apertura de cabianes de drenaxe, y la llimpieza, estabilización, afitamientu y restauración de murios, pozos y barcales. Estes actuaciones enmárquense nel Proyecto Campa, promovido pol Conceyu de Xixón y pal que consiguió financiamientu del denomináu 1,5% cultural del Ministeriu de Tresportes, Movilidá y Axenda Urbana.