Categories Navigation

Categories Navigation

El Gobiernu d’Asturies afítase como referente de bones práctiques na xestión del so parque inmobiliariu

28/10/2021

 
 

  • L’Asociación Española de Xestores Públicos de Vivienda y Suelu premien el programa Housing First del Principáu.
  • L’edificiu de 20 pisos construyíu baxo l’estándar Passivhaus en Muros de Nalón lleva un accésit como Meyor edificación n’obra nueva.

El programa Housing First, impulsáu pola Conseyería de Derechos Sociales y Bienestar, recibió’l primer premiu na categoría de Meyor actuación na alministración y xestión del parque social de viviendes, nos gallardones convocaos pola Asociación Española de Xestores Públicos de Vivienda y Suelu (AVS). Tamién foi reconocíu l’edificiu de 20 pisos de promoción pública construyíu en Muros de Nalón baxo l’estándar Passivhaus col primer accésit na categoría de Meyor edificación n’obra nueva.

El director xeneral de Vivienda, Fermín Bravo, encargáu de recoyer estos gallardones nun actu celebráu güei en Sevilla, recordó los principios de Housing First, n’avientu del 2016, cuando’l programa cuntaba con namás trés viviendes del parque públicu n’Avilés. ”Nos postreros cinco años multiplicóse por 13 y yá son 38 repartíes en seis localidaes”.

Bravo destacó que “lo más importante ye que yá son 45 les persones con una llarga trayectoria de vida na cai que pudieron acceder como inquilinos de plenu derechu a una vivienda pública con una renta media que n’Asturies s’asitia en 77 euros, pero que s’afái al nivel d’ingresos de cada usuariu”.

Los testimonios de delles d’estes persones que se beneficiaron del programa puen vese nesti enllaz https://www.vipasa.info/acerca-de-vipasa/testimonios-reales.

Bravo reconoció’l papel tan importante de la empresa púbica Vipasa na xestión del parque inmobiliariu del Principáu. ”Nun podríemos tar falando d’estos resultaos ensin el llabor que desempeña; ye’l nuestru instrumentu principal pa facer efectiva la política de vivienda social del Principáu”.

En referencia a les 20 viviendes de promoción pública construyíes baxo l’estándar Passivhaus en Muros de Nalón, destacó l’apueste del Gobiernu d’Asturies por aumentar la eficiencia enerxética y el confort de los pisos, non solo en términos de construcción sinón tamién cola rehabilitación d’edificios.

“Multipliquemos por siete los fondos destinaos a les ayudes a la rehabilitación d’edificios gracies al trabayu que desenvuelven les comunidaes de vecinos con alministradores de finques y con un sector d’empreses de rehabilitación que ye punteru n’España. Amás de disponer d’edificios muncho más eficientes, el nuestru oxetivu ta centráu n’ameyorar les condiciones de confort y aforru de les persones que viven nellos”, aseguró.

Los premios de l’Asociación Española de Xestores Públicos de Vivienda y Suelu tienen como oxetivu poner en valor les iniciatives desenvueltes pol sector en favor de la vivienda pública, social y asequible, amás de visibilizar estes polítiques como exa central de vertebración y inclusión social.

A esta edición presentáronse 30 candidatures repartíes en cinco categoríes: edificación n’obra nueva, alministración y xestión del parque social de viviendes, rehabilitación y revitalización urbana, xestión instrumental de servicios públicos y meyor xestión medioambiental.

El xuráu, compuestu por espertos de prestixu y representantes de Housing Europe —la Federación Europea de Provisores de Vivienda Pública, Social y Asequible—, definió’l programa Housing First d’Asturies como un modelu innovador pa lluchar contra la falta de casa onde vivir. Destacó tamién la so sostenibilidá, porque s’integra nel mesmu sistema d’axudicación de vivienda, amás de la gobernanza y la coordinación ente delles alministraciones. Destaca, amás, que’l contratu d’arrendamientu fírmase cola persona, lo que lu convierte n’inquilín del parque públicu y polo tanto, suxetu de derechos y obligaciones.

Al respective de la edificación de Muros de Nalón, el xuráu destacó la mengua d’emisiones de CO2 a l’atmósfera gracies a la so estructura de madera; la fabricación nuna nave industrializada, lo que fai posible un montaxe rápidu y conviértelu nun sistema competitivu; el cuidáu de la superficie envolvente, que garantiza un zarru herméticu y estancu, y l’usu subsidiariu de sistemes cenciellos qu’asegura’l confort térmicu.


​​​​​​​ ​​​​​​​Declaraciones del director general de vivienda, Fermín Bravo (Mp3: 240 Kb)