Categories Navigation

Categories Navigation

El Principáu axudica de manera provisional 1.007 puestos de responsabilidá na Alministración autonómica

29/10/2021
  • El Bopa publica güei los resultaos del concursu de méritos convocáu por función pública.

La Conseyería d'Alministración Autonómica publicó güei nel Boletín Oficial del Principáu d'Asturies (Bopa) l'axudicación provisional de 1.007 puestos de responsabilidá a otros tantos funcionarios que se presentaron a la convocatoria del concursu de méritos pa la provisión de puestos singularizaos; esto ye, aquellos que riquen unes característiques propies pal so desempeñu, como una titulación determinada, tiempu d'esperiencia nel área funcionarial o cursos específicos, ente otres.

Agora ábrese'l periodu d'apelaciones preceptivu que, en rematando, va dexar a la conseyería, en febreru de 2022, axudicar definitivamente estos puestos, rellacionaos con xefatures de serviciu, lletraos, coordinadores, xefes de sección y negociáu y otros relevantes pal funcionamientu de les conseyeríes.

Col concursu, al que se presentaron 1.502 funcionarios, conclúi un periodu de más de 17 años ensin tramitase esti tipu d'espedientes, una cuestión que xeneraba problemes d'inestabilidá nos emplegaos públicos.

El procedimientu pa la provisión singularizada empecipia en xunu de 2019, depués de desenvolver normativamente les novedaes en materia de provisión de puestos qu'introdució la llei de midíes en materia de función pública y organización alministrativa del Principáu, aprobada en 2014. La nueva normativa remató'l pasáu mayu cola aprobación pol Conseyu de Gobiernu del cambéu de la relación de puestos de trabayu (RPT), el preséu qu'establez la estructura de personal na Alministración autonómica, los sos organismos y entes públicos, p'afacela a les necesidaes actuales y recoyer tolos cambeos producíos dende l'entamu de la llexislatura.

El cambéu foi un pasu previu imprescindible pal entamu de los trabayos de les trés comisiones de valoración que se constituyeron pa evaluar los méritos del funcionariáu participante nel concursu.

Amás, la Dirección Xeneral de Función Pública tramita anguaño otros espedientes que van dexar siguir actualizando la xestión de los recursos humanos de l'Alministración del Principáu, los sos organismos y entes públicos. Ente ellos, el concursu de tresllaos de personal llaboral, del que la convocatoria ta prevista pal próximu payares y el concursu de méritos de puestos singularizaos que salieron del concursu o son nuevos pola remodelación de conseyeríes. Esti postreru va convocase na primavera de 2022.