Categories Navigation

Categories Navigation

La Fundación Barredo y el Centru Nacional del Hidróxenu collaboran nel desenvolvimientu de la movilidá sostenible nel tresporte ferroviariu

29/10/2021
  • La entidá asturiana axudica al CHN2 l'asistencia técnica pa redactar los pliegos d'un contratu d'inxeniería pa un proyectu d'usu del hidróxenu como combustible llimpiu .
  • La Conseyería d'Industria avanza nel apueste estratéxicu por fontes enerxétiques alternatives qu'afiten la descarbonización de la economía.

La Fundación Barredo y el Centru Nacional del Hidróxenu (CNH2) van collaborar na investigación del hidróxenu como combustible alternativu y sostenible pal so usu nel sector ferroviariu.

La entidá presidida por Enrique Fernández, conseyeru d'Industria, axudicó al CHN2, entidá de referencia a nivel nacional na investigación del hidróxenu un primer contratu d'asistencia técnica pa la redacción de los pliegos d'una llicitación posterior que se va concretar nun proyectu d'inxeniería de detalle y control pal usu del hidróxenu nel tresporte ferroviariu.

Al traviés d'esta collaboración, la Conseyería d'Industria quier avanzar nel procesu de transición enerxética que, ente otros oxetivos, quier la incorporación de fontes d'enerxía con menor carga ambiental nos distintos sectores d'actividá. L'hidróxenu ye una d'elles, cola posibilidá de ser utilizáu directamente en procesos fundamentalmente industriales, ser inyectáu na rede gasista o sirvir como combustible alternativu nel sector tresporte.

Enrique Fernández destacó l'impulsu del so departamentu a los oxetivos de descarbonización que, nel casu de la Fundación Barredo, diríxense al desenvolvimientu d'actuaciones en proyectos aplicaos, tracción d'actividá ya investigación y na collaboración con otres entidaes.

Con esta primer llicitación de la Fundación Barredo articúlense les primeres actuaciones concretes en H2 de collaboración público-privada, nes que la conseyería lleva meses trabayando al traviés de la Mesa del Hidróxenu, na que participen más de cuarenta empreses y entidaes.

Frutu del trabayu nesti foru yá s'identificaron 34 proyectos venceyaos al hidróxenu con una inversión envalorada de 3.776 millones y presentóse na Unión Europea'l Proyectu Recode (Reactivación, Competitividá y Descarbonización), que aúna una ventena d'iniciatives agrupaes nun clúster pa la producción de H2 destináu a consumu industrial, almacenamientu y usos pol sectores como'l tresporte.