Categories Navigation

Categories Navigation

El Principáu reabre güei’l pasu pela ponte de Quinzanas, en Pravia

29/10/2021
  • La Conseyería de Mediu Rural y Cohesión Territorial invirtió más de 1.500.000 euros en remodelar la estructura, que venció’l 1 de xineru pasáu pola mor del temporal d’agua.

La ponte de Quinzanas vuelve tar en serviciu. La Conseyería de Mediu Rural y Cohesión Territorial va reabrir al tráficu, a lo llargo d’esta tarde, la infraestructura nueva que conecta les dos veres d’El Ríu Narcea al traviés de la carretera AS-39 (Pravia-Corniana a San Tisu). Desque yá se fixeron toles comprobaciones xeométriques y estructurales de la ponte, peatones y vehículos yá van poder volver transitar per ella con tola seguranza.

Rematen, d’esta manera, cuasi diez meses de trabayu nos que’l Principáu realizó una inversión que supera’l millón y mediu. La renovación d’esta infraestructura supunxo un retu técnicu. A la complexidá de la obra en sí mesma hai que sumar otres, como la dificultá d’entrar al ríu con grandes aveníes d’agua, el cumplimientu estrictu de la normativa medioambiental nuna zona singular y la incomodidá que suponía tener cortada la carretera.

Pa la construcción de la ponte nueva prescindióse del pilar central de la estructura. La retirada del vieyu, qu’esbarrumbare, foi ún de los llabores más complexos de la obra. Pa facelo foi menester cuntar con una grúa de gran tonelaxe y trenta camiones tráiler pa tresportar les pieces.

Precisamente foi’l fundimientu progresivu de la pilastra central, que s’acentuó coles invernaes d’avientu del 2020, lo qu’anició’l problema. L’aumentu del caudal del Narcea llegó a romper les lloses del tableru de la ponte, lo qu’obligó a zarrar el pasu peatonal y rodáu dende’l 1 de xineru hasta güei por motivos de seguranza.