Categories Navigation

Categories Navigation

El Principáu constata l’éxitu de l’aplicación del protocolu d’intervención en dellos casos d’osos avezaos a la presencia humana

02/11/2021

​​​​​​​Un momento de la actuación

  • Los últimos datos de la Conseyería de Mediu Rural, que ta rematando’l censu xenéticu y el rexistru d’oses con cría, indiquen que la recuperación de la especie sigue avanzando.
  • La Dirección Xeneral del Mediu Natural xeolocaliza’l primer exemplar con tecnoloxía vía satélite.

Los últimos datos axuntaos pol Gobiernu del Principáu amuesen que la población d’osos pardos nel cordal Cantábricu avanza na so recuperación. Los resultaos preliminares del censu xenéticu y del rexistru específicu d’oses con cría indiquen tanto un aumentu de población como una mayor área de distribución.

El censu xenéticu y el d’oses con críes son los más relevantes pa conocer la evolución de la especie. Los trabayos pa ellaborar el primeru incluyen técniques d’última xeneración que dexen analizar la diversidá xenética de cada individuu amás de determinar el grau de rellación ente proxenitores y parentescu ente suxetos. Pa esti llabor cúntase col sofitu de la Universidá Autónoma de Barcelona, col Institutu de Bioloxía Evolutiva del CSIC y col Institutu de Recursos Cinexéticos, tamién del CSIC.

En cuanto al rexistru d’oses con cría, les estimaciones iniciales tamién son positives y apréciase una enclín al alza de la especie na nuestra rexón. L’estudiu, que se realiza dende va más de venti años en tol cordal Cantábricu, atópase agora en plena ellaboración n’Asturies y la so conclusión ta prevista pa les selmanes vinientes.

Los trabayos realizaos nel marcu del protocolu d’intervención con osos avezaos a la presencia humana, tamién tán dando resultaos positivos. Asina, en delles intervenciones foi abondo con aplicar les midíes previstes na primer fase del protocolu, na que s’incluye’l llanzamientu de petardos o boles de goma, pa tornar a los exemplares. Asina asocedió con una pareya d’esbardos de la zona de La Peral, en Somiedu, que s’alloñaron d’una zona poblada a la que s’averaben de manera recurrente y con otros casos en llugares del Valle del Trubia.

N’Ibias tamién se desenvolvieron dos operaciones asemeyaes, que nún de los casos incluyó un radiomarcaxe. Tres delles selmanes de siguimientu de contino, tanto polos axentes del Mediu Natural como con cámares de videovixilancia, pudo instalase un crotal y un collar con GPS a un exemplar. El GPS acabó soltándose, tanto pola fisonomía del animal como pola metodoloxía utilizada, escoyida pa causar la mínima afección posible.

Tamién nel marcu d’esti protocolu se fixo la primer xeolocalización por satélite d’un osu na zona suroccidental. Nel operativu participaron personal técnico y miembros de la Patrulla Osu de la Dirección Xeneral de Mediu Natural, amás d’espertos de la Universidá d’Uviéu y de la Fundación Osu Pardu, cola que l’Alministración autonómica collabora davezu.

L’actuación llevóse a cabu con una fema adulta d’unos 100 quilos, a la que se-y punxo un sistema doble de siguimientu: un emisor de señal de radiu engancháu a la pelame del llombu y un collar que dexa realizar un siguimientu de contino al traviés de tecnoloxía vía satélite (rede Iridium). Esti dispositivu emite una señal col so allugamientu y tamién avisa si l’animal entra nuna zona delimitada, a manera de zarru virtual. Esto va favorecer una actuación más rápida de los axentes del Mediu Natural pa provocar una respuesta de deshabituación.

El programa de xeolocalización d’osos pardos centróse naquellos exemplares avezaos a la presencia humana y que presenten conductes repetíes d’averamientu a núcleos habitaos. La midida tómase cuando nun surten efectu les demás acciones recoyíes nel protocolu d’intervención pa tornar los exemplares.

Estos llabores tán aprobaos pol grupu de trabayu del osu pardu cantábricu, integráu por Asturies, Galicia, Castiella y Llión, Cantabria y el Ministeriu pa la Transición Ecolóxica y el Retu Demográficu.