Categories Navigation

Categories Navigation

El Gobiernu d’Asturies avanza na renovación integral de l’AS-12 cola adecuación de los primeros 25 quilómetros

02/11/2021
  • Infraestructures principia tamién la llicitación de los proyectos técnicos del tramu ente Bual y Xío.

El Gobiernu d’Asturies empezó la selección d’ufiertes pa la reforma del primer tramu del corredor del Navia (AS-12), que suma 25 quilómetros y xunta El Espín, en Cuaña, con Bual. L’actuación cunta con un presupuestu base de 600.000 euros y ta cofinanciada pol Fondu Européu Agrariu de Desenvolvimientu Rural (Feader).

Les obres van consistir na meyora del firme, el drenaxe y la señalización de los puntos del trazáu que presenten más defectos nesti primer tramu ascendente de la vía, el que s’atopa en meyor estáu de caltenimientu de tola AS-12. Los trabayos van concentrase n’ocho subtramos que sumen cuasi seis quilómetros ente l’entronque d’esta vía cola carretera nacional (la N-634) y la capital de Bual.

Tamién empezó la llicitación de los proyectos técnicos del tramu ente Bual y Xío, estremáu en dos actuaciones: Bual-Doiras y Doiras-Xío. El presupuestu base pa la redacción de los estudios ye de 496.319 euros, y el plazu d’execución, de siete meses.

Esta actuación va dexar anovar 13,5 quilómetros, de los que 6,879 correspuenden a la parte de Bual a Doiras y 6,651 a la que va de Doiras a Xío. Amás de la meyora integral de la calzada, la obra incluye la construcción de trés viaductos: ún de 90 metros ente les localidaes de Peiróis y Muñón nel primer tramu; y otros dos nel segundu. El mayor, de 249 metros, pa salvar el banzáu de Doiras, y otru de 111 metros ente Zadamoño y Xío.

La llicitación de los trabayos, que se va llevar a cabu en cuanto concluya la redacción de los proyectos, va cuntar con un presupuestu de 37.501.305 euros: 18.673,58 para Boal-Doiras y 18.827.724 para Doiras-Gio. El costu mediu por kilómetru ye de 2.771.716 euros.

Estos trabayos enmárquense nel plan de meyora del corredor del Navia, que la so actuación principal va consistir na rehabilitación de los 43 quilómetros que xunten Bual y Grandas de Salime al traviés d’Eilao y Pezós.

 

Inversión total cercana a los 120 millones

La inversión total calculada pa la rehabilitación integral de l’AS-12 xube a 118.762.877 d’euros. L’actuación propón l’ampliación del anchu de vía a seis metros con dos arcenes de mediu metro, y variantes de trazáu en 14 sectores. Tamién prevé introducir delles meyores, como eliminar los puntos negros, rectificar radios de curvatura y aumentar los sobreanchos nes curves pa dotar al percorríu d’una visibilidá afayadiza.

Incluye amás la construcción de cinco grandes viaductos, trés nos dos primeros tramos y otros dos nel tramu que va dafechu pel conceyu de Pezós.

Los técnicos de la Conseyería de Mediu Rural y Cohesión Territorial calculen que pa la realización d’estes obres va ser menester remover más de 900.000 metros cúbicos de terrén pa realizar desmontes y 600.000 metros cúbicos p’afitar el terremplén.

Toes estes meyores van dexar amenorgar un 41 % el tiempu de viaxe entre Bual y Grandas de Salime, que va pasar de 81 minutos a 48, tal como informó la Conseyería de Mediu Rural y Cohesión Territorial a los alcaldes de la zona esti mes de xunetu.