Categories Navigation

Categories Navigation

El Principáu participa con una inversión de 6 millones nun proyectu nacional d’I+D+i pa producir hidróxenu verde y reducir emisiones

02/11/2021
  • El programa enmárcase nos planes complementarios del Ministeriu de Ciencia y implica a ocho comunidaes y al CSIC
  • El Gobiernu d’Asturies va desenvolver una planta pilotu pa realizar pruebes del usu d’esti elementu na industria

Asturies participa nun proyectu nacional d’I+D+i sobre enerxía y hidróxenu verde, con una inversión de seis millones. El Principáu va desenvolver una planta pilotu pal diseñu y prueba d’usos del hidróxenu nel sector industrial y va ayudar al estudiu de la producción d’esti elementu a partir d’enerxía renovable, amás del so usu pa reducir emisiones de CO2.
 
Esti programa forma parte de los planes complementarios del Ministeriu de Ciencia y Innovación y va desenvolvese en collaboración col CSIC y ocho comunidaes autónomes, una d’elles Asturies. El Conseyu de Gobiernu aprobó’l vienres el protocolu correspondiente, que tien que se firmar nes selmanes vinientes.
 
El proyectu va cuntar con fondos europeos del Plan de Recuperación, Tresformación y Resiliencia y financiamientu propiu de les comunidaes autónomes. En total, va movilizar 89 millones en tol país. El Principáu va recibir daqué más de 3,8 millones y va apurrir al plan otros 2,1 millones. En total, 6 millones.
 
El programa propón delles llinies d’investigación y desenvolvimientu tecnolóxicu sobre la xeneración d’hidróxenu verde, el so almacenamientu y suministru, y el so usu final en tresporte pesáu o industria. Busca tamién reducir la emisión de gases d’efectu ivernaderu. Amás d’Asturies, participen País Vascu, Aragón, Castiella-La Mancha, Canaries, Comunidá Foral de Navarra, Estremadura y Comunidá de Madrid, amás el CSIC.
 
El Principáu va tener presencia en llinies lligaes sobre manera a la xeneración d’hidróxenu verde a temperatura baxo y al so usu industrial calteniendo les emisiones per debaxo de los topes impuestos pola Unión Europea.
 
Nesti contestu, la Conseyería de Ciencia, Innovación y Universidá va promover el desenvolvimientu d’una planta pilotu industrial pa la realización de pruebes y la investigación sobre l’hidróxenu verde na mengua d’emisiones de CO2. El programa incluye tamién la interacción ente la Universidá d’Uviéu, organismos d’investigación y empreses al traviés de proyectos collaborativos que puedan atrayer fondos de convocatories europees.
 
El conseyeru de Ciencia, Innovación y Universidá, Borja Sánchez, destacó qu’Asturies tamién va ser clave na tresferencia de los resultaos d’esti programa al texíu productivo.
 
El proyectu d’enerxía y hidróxenu verde ta alliniáu col Plan de Ciencia, Tecnoloxía y Innovación (PCTI) d’Asturies y con una de les Misiones Científiques, qu’anguaño tien en marcha trés proyectos pilotu pa reducir la emisión de gases d’efectu ivernaderu.
 
L’oxetivu final ye modernizar la economía española y avanzar na transición escontra una economía y sociedá climáticamente neutres, sostenibles y circulares, amás d’eficientes nel usu de recursos.​​​


Declaraciones del consejero de Ciencia, Innovación y Universidad, Borja Sánchez (mp3: 1488 Kb)