Categories Navigation

Categories Navigation

El Gobiernu d’Asturies condena l’agresión homófoba a un rapaz en La Pola Siero

02/11/2021
  • La conseyera de Presidencia tresllada a la víctima l’apoyu del Executivo autonómicu .
  • “Estos actos nunca tienen xustificación, pero menos tovía nuna sociedá como l’asturiana qu’alienta valores como’l respetu, la solidaridá, l’ayuda mutua, la integración, la convivencia y la llibertá”, asegura Camblor.

El Gobiernu d’Asturies condena l’agresión homófoba a un mozu na mañana del llunes en La Pola Siero. La conseyera de Presidencia, Rita Camblor, tresllada’l respaldu del Executivu a la persona que sufrió esti ataque. “Estos actos nun tienen xustificación dalguna, menos entá nuna sociedá como l’asturiana, qu’alienta valores como’l respetu, la solidaridá, l’ayuda mutua, la integración, la convivencia y la llibertá, y que busca que cada ciudadanu pueda desenvolver al máximu les sos capacidaes individuales y sociales”, aseguró.

Camblor manifestó la so “repulsa absoluta” a los fechos denunciaos “porque les manifestaciones de refugu, despreciu y violencia exercíes pola mor de la orientación sexual y la identidá de xéneru de les persones son daqué intolerable que ye menester desaniciar”.

Amás, la conseyera anunció una convocatoria inminente del Observatoriu contra la LGTBIfobia cola mira de siguir trabayando colos colectivos implicaos nesta causa, garantizar la espresión llibre de la diversidá sexual y la identidá de xéneru, y espresar un refugu total énte esta clas de comportamientos.

Pela so parte, la directora xeneral de Mocedá, Diversidá Sexual y Derechos LGTBI, Clara Sierra, va participar esta tarde, a les 19:30 hores, na concentración en repulsa pola agresión que se va celebrar na plaza del Conceyu de La Pola Siero.

El Principáu tien el teléfonu gratuitu 635 178 634 p’atender de manera áxil y profesional les necesidaes de les víctimes de LGTBIfobia. Esta llinia ta operativa les 24 hores, tolos díes del añu, tanto en mou de llamada convencional como con mensaxería per wasap, y puen usala tanto les víctimes d’una agresión como los testigos.