Categories Navigation

Categories Navigation

L’empléu vuelve medrar n’Asturies con 1.593 afiliaciones nueves a la Seguridá Social y un aumentu del 8,84 % de la contratación

03/11/2021
  • El Principáu rexistra otru mínimu trabayadores n’ERTE: 3.233 persones en regulación, 675 menos qu’en setiembre.
  • El paru rexistráu asitíase en 65.756 persones, la cantidá más baxa pa un mes d’ochobre dende’l 2008.

L’empléu volvió medrar n’Asturies, con un aumentu nes afiliaciones a la Seguridá Social de 1.593 persones (+0,43 %) n’ochobre y un repique fuerte de la contratación, sobre manera la de calter indefiníu.

Según los datos publicaos güei pol Gobiernu d’España, la comunidá zarró l’últimu mes con una afiliación media de 368.117 cotizantes, lo que supón alredor de 6.000 afiliaos nuevos en comparanza con ochobre del añu pasáu. En términos porcentuales, l’aumentu ye del 1,65 %.

Esta evolución positiva compruébase tamién al analizar les cifres mensuales de contratación, que dan una medría del 8,84 %, hasta sumar 31.171 empleos nuevos. Esto supón que n’ochobre firmáronse n’Asturies 1.005 contratos diarios de media, un 24,93 % más que nel mesmu mes del 2020.

Por modalidá de contratación, la de calter indefiníu aumentó’l 22,29 %, con 3.007 contratos fixos. Trátase d’un 37,06 % más que l’añu pasáu. Amás, contabilizáronse 28.164 contrataciones temporales, un 7,58 % más en términos mensuales y un 23,76 % si se compara coles cifres de va un añu. No que va d’añu firmáronse n’Asturies 245.760 contratos: 21.895 indefiníos y 223.865 temporales.

Ochobre tamién remató con un mínimu de 3.233 persones n’ERTE, concretamente 1.434 homes y 1.799 muyeres. D’alcuerdu colos datos de la Seguridá Social, son 675 menos qu’al rematar setiembre. Amás, 1.514 empreses caltienen espedientes de regulación d’empléu nel Principáu, 300 menos que’l mes pasáu.

Otra manera, el desempléu rexistráu xubió n’Asturies en 1.548 persones (2,41 %) al respective de setiembre, hasta asitiase en 65.756, lo que supón el númberu más baxu de demandantes pa un mes d’ochobre dende’l 2008. El paru aumentó en tolos tramos d’edá y en tolos sectores, sacante la construcción, onde baxó’l 0,86 %. Alredor de siete de cada diez nueves persones al paru correspuenden al sector servicios. A nivel nacional, el desempléu menguó un 0,02 %.

La comparancia interanual, otra manera, ye más favorable a Asturies. Asina, nel Principáu’l paru menguó en 13.948 persones, el 17,50 %, cuasi trés puntos percima de la media estatal (14,87 %). D’esta manera, el Principáu asítiase como la sesta comunidá onde más baxó’l desempléu nos postreros doce meses. La industria, la construcción y el colectivu ensin empléu anterior son los sectores onde más baxó.