• Los trabayos gallardonaos: Anatomía d’un farfagón, Muerdo y Tiempos de penuria van editase na Colección Texu

 
Aníbal González Rodríguez, col poemariu Anatomía d’un farfagón; Nuria Barranco, coles narraciones curties Muerdo; y Ivana Castañón Vázquez, col testu teatral Tiempos de penuria resultaron ganadores de los premios Asturies Xoven de Poesía, Narrativa y Testos Teatrales 2021, convocaos pola Conseyería de Presidencia.
 
Cada autor va recibir 50 exemplares de les obres, que van publicase dientro de la Colección Texu, que nesta ocasión algama les 76 ediciones, lo que la convierte nuna muestra importante de la lliteratura nueva asturiana y axunta llibros de tolos premiaos. La escoyeta inclye trabayos de dalgunos de los meyores escritores de la última xeneración, como José Luis Piquero, Martín López-Vega, Jordi Doce, Ricardo Menéndez Salmón, Ignacio del Valle, Pablo Rodríguez Medina, Ismael Piñera, Chus Fernández, Jon Bilbao, Sofía Castañón, Miguel Barrero, David Barreiro, Rodrigo Olay y José Ángel Gayol, ente más otros.
 
Aníbal González Rodríguez (Morea, 1991) estudió realización audiovisual y filosofía. Escribió ensayos en castellanu, poesía en castellanu y asturianu y tamién dalgún cuentu. Participó nel concursu de microrrellatos Entaina 2021 y dellos de los sos poemes tán publicaos en Formietu Dixital.
 
Nuria Barranco Flores (Madrid, 1989) ye llicenciada en Filoloxía Hispánica y doctora n'Estudios Humanísticos pola Universidá d'Uviéu, con una tesis sobre estratexes pragmátiques d'orientación de la interpretación nos testos periodísticos informativos. Trabayó en distintos institutos como profesora de Lengua Castellana y Literatura. Anguaño imparte esta materia nel IES Ástures de Llugones. Muerdo ye'l so primer llibru de relatos.
 
Ivana Castañón Vázquez (Castrillón, 1995) ye graduada en Filosofía y Socioloxía y máster n'Estudios de la Ciencia, la Tecnoloxía y la Innovación y en Formación del Profesoráu. Recibió diversos premios, ente los que destaquen l’Astragal, contra la violencia sexista, y el Nuevos Realizadores contra la violencia de xéneru 2019. D’equí a poco va esponer na Sala Borrón 2022, dientro del Programa de Xóvenes Artistes del Principáu d'Asturies.

El programa Culturaquí que desenvuelve la Conseyería de Presidencia promueve la creación artística xuvenil nes distintes modalidaes que conformen les artes plástiques, la lliteratura o la música; fomenta la participación de xente mozo con moliciones artístiques y divulga estes manifestaciones culturales tanto dientro como fuera del Principá​​​​​​​.