• Un grupu de 75 neñes y neños depositaron güei la misiva nuna caxa enterrada en Tablizas, que va abrise dientro de 48 años
• El recipiente tamién lleva la declaración d’emerxencia climática del Gobiernu d’Asturies, proyecciones climátiques y delles fotografíes
• La viceconseyera Nieves Roqueñí subraya que les xeneraciones futures “han disfrutar d’un planeta habitable”.

Una cápsula del tiempu guarda dende güei nel monte de Munieḷḷos, nel conceyu de Cangas, una carta que neñes y neños unvien a los mozos que van vivir nel Principáu dientro de 48 años y na que-yos espliquen la so visión de la crisis climática actual, al empar que-yos treslladen la so esperanza nel porvenir de la Tierra como planeta habitable. 

El dispositivu, que tendrá que guardase hasta 2070, asitióse esta mañana en Tablizas, la puerta d'entrada a Munieḷḷos, nun actu entamáu pol Gobiernu d'Asturies nel que participó la viceconseyera de Mediu Ambiente y Cambéu Climáticu, Nieves Roqueñí; l'alcalde de Cangas, José Víctor Rodríguez, y un  grupu de 75 estudiantes del colexu públicu de La Puela  y del IES de Pravia. 

El depósitu de la cápsula enmárcase na iniciativa Emerxencia climática escolar, desenvuelta a finales de 2019, coincidiendo cola Cume Mundial del Clima (COP25) celebrada en Madrid, na que participó alumnáu de distintos centros asturianos, que treslladó la so visión sobre'l problema del cambéu climáticu. La pandemia del coronavirus obligó a cancelar l'actu celebráu güei en Cangas nel momentu previstu primeramente, la primavera de 2020.

Primero de sellar la caxa, dos estudiantes lleeron la carta en nome de tola mocedá d'Asturies, sol encabezamientu A los nuesos compañeros y compañeres habitantes del futuru. Amás, la cápsula contien tolos escritos sobre emerxencia climática escolar realizaos por alumnáu de los colexos públicos de La Puela; La Salle, de la Felguera, y Carlos Bousoño, de Bual, lo mesmo que de los institutos de Los Campos, en Corvera; de Pravia y Valle d'Ayer. Tamién s'incluyó la declaración d'emerxencia climática alcordada pol Conseyu de Gobiernu'l pasáu vienres, amás de les proyecciones climátiques a 2050 y 2100, con cuenta de se compruebe si finalmente se cumplierpm los pronósticos. A lo último, axuntáronse distintes fotografíes del actu d'allugamientu y de los sos protagonistes.

La cápsula, ellaborada con un material qu'asegura'l so estanqueidad y preservación y cerrada herméticamente, metióse nun caxón de formigón asitiáu baxo un monolitu d'aceru corten.

En rematando l'actu desenvolviéronse distintes actividaes didáctiques alredor del papel que los montes desenvuelven na mitigación del cambéu climáticu.

“La importancia de xestos como'l de la declaración d'emerxencia climática, realizada por munchos gobiernos, incluyíu'l del Principáu, sirven pa poner de manifiestu'l compromisu de la sociedá na llucha contra'l calentamientu global”, esplicó la viceconseyera de Mediu Ambiente. “Trátase d'aseguranos de que les futures xeneraciones puedan esfrutar d'un planeta habitable y, como señalen los mozos na carta, dignu de ser vivíu”, amestó.

Declaraciones de la viceconsejera de Medio Ambiente y Cambio Climático, Nieves Roqueñí (mp3: 1265 Kb)