El Centru de Recuperación de Fauna Montesa del Principáu, allugáu en Sobrescobiu, acueye los sos primeros güéspedes
- Un gallu montés, un águila culebrera, dos busardos ratoneros, una peñerina, un miagón y un ferre pelegrín reciben yá atención nel equipamientu
- L'espaciu va sirvir de sede para investigar sobre especies protexíes, en collaboración col Serida y la Universidá d'Uviéu, y va tener un aula pa divulgación y educación ambiental
El Centru de Recuperación de Fauna Montesa del Principáu, allugáu en Sobrescobiu, acueye yá los sos primeros güéspedes: un gallu montés, un águila culebrera, dos busardos ratoneros, dos corpuspinos, una peñerina, un miagón y un ferre pelegrín, que yá reciben atención nel equipamientu.
El conseyeru de Mediu Rural y Cohesión Territorial, Alejandro Calvo, acompañáu pol director xeneral del Mediu Natural y Planificación Rural, David Villar, y pol alcalde de Sobrescobiu, Marcelino Martínez, visitaron güei les instalaciones, allugaes nel monte d'utilidá pública Isorno y con más de 4.000 metros cuadraos de terrén.
El centru va acoyer tolos animales monteses con problemes que recueyan los axentes del Mediu Natural, sobre manera exemplares d'especies protexíes o en peligru d'estinción. Ellí va evaluase’l so estáu y condiciones físiques, van curase y rehabilitase, col fin últimu de reintroducilos darréu nel so hábitat natural.
Les instalaciones cunten con sales de vuelu d'aves rapaces, pa qu’estos animales exerciten los sos músculos primero del so procesu de lliberación. Tamién tienen quirófanos y llaboratorios que van dexar desenvolver un llabor investigador mediante les necropsias que se van realizar a los exemplares muertos y a aquellos que nun llogren recuperase. Esto va dexar reforzar la collaboración con personal científico del Serida y de la Universidá d'Uviéu, que se caltién dende va años, no que fai a especies como'l gallu montés, l'osu pardu o les aves carroñeres.
Nel 2020 rexistráronse 1.670 intervenciones con fauna montesa, de les cuales 365 riquieron atención veterinaria. En concreto, emprestóse atención a animales de 70 especies distintes y, d'ellos, 158 recuperáronse y reintroduciéronse nel mediu natural, munchos con dispositivos de xeolocalización. Nel casu de les aves, toes lliberáronse anillaes pal so estudiu posterior.
Nos últimos años constatóse un paulatín aumentu del númberu d'animales recoyíos con problemes que riquieron asistencia veterinaria, qu'agora va facilitase afechiscamente en Sobrescobiu.
Programa de vixilancia sanitaria de fauna montesa
L'equipamientu va ser el centru de referencia del Programa de Vixilancia Sanitaria de Fauna Montesa, implantáu n'Asturies dende’l 2003. Esta iniciativa dexa detectar y evaluar distintos procesos patóxenos na fauna montesa que puen representar un riesgu non solo pa les sos poblaciones, sinón tamién pal ganáu doméstico o pa les persones.
La Dirección Xeneral del Mediu Natural coordina'l programa en collaboración cola de Ganadería y Sanidá Animal. De resultes del so trabayu conxuntu intensificáronse les recoyíes de muestres que darréu s'analicen nel llaboratoriu de Sanidá Animal de Xove. Nel añu últimu, fízose la necropsia y estudiu de 115 animales: 73 mamíferos y 42 aves.
Aula d'interpretación
El Centru de Recuperación de Fauna Montesa tien tamién un aula d'interpretación que va dexar desenvolver un plan d'educación ambiental pa dar a conocer los llabores que se lleven a cabu y les sos implicaciones nel caltenimientu de la naturaleza, de la que va dexar divulgar la importancia de caltener la biodiversidá.
L'aula tien una zona espositiva, onde se muestra cómo se realicen los trabayos de rescate y recuperación de los animales, y un conxuntu de videocámares que monitoricen en tiempu real los exemplares acoyíos nel centru y les sales de vuelu de rapaces. Too ello compleméntase con un área que va dexar velos en directo.
