Categories Navigation

Categories Navigation

Salú constata un amenorgamientu del consumu d'antibióticos del 73% ente la población infantil y del 40% n'adultos n'atención primaria nos postreros siete años

17/11/2021

La Conseyería de Salú constató un descensu del consumu d'antibióticos del 73% na población infantil y del 40% n'adultos n'atención primaria nos postreros siete años. Esti amenorgamientu yá se reparaba nos últimos exercicios, anque s'intensificó en 2020, especialmente ente pacientes pediátricos.

Estes son dos de les conclusiones del Estudiu d'antibióticos n'atención primaria n'Asturies nel periodu 2014-2020 realizáu pola Dirección Xeneral de Política y Planificación Sanitaries. Los sos resultaos presentaránse mañana na I Xornada sobre l'usu prudente del antibióticu nel Principáu, coincidiendo col Día Européu pal Usu Prudente de los Antibióticos, una iniciativa impulsada pol Centru Européu pa la Prevención y el Control de les Enfermedaes y entamada pola Coordinación de la Estratexa de Seguridá del Paciente de la Dirección Xeneral de Calidá, Tresformación y Xestión del Conocimientu en collaboración col Institutu Asturianu Adolfo Posada (IAAP).

La directora xeneral de Calidá, Tresformación y Xestión del Conocimientu, Elena Llorente, va inaugurar de manera telemática la xornada, que se va celebrar ente les 9:30 y les 14:00 hores, nel salón d'actos del Hospital Universitariu Central d'Asturies (HUCA).

L'analís revela que s'ameyoró l'usu na prescripción antibiótica n'Asturies. Nesti sentíu, rexistróse un descensu nel consumu de amoxilicina - acedu clavulánico. Amás, reparóse que ye mester optimizar la prescripción de les cefalosporinas de tercer xeneración ente la población infantil.

Nel estudiu obsérvase un descensu del consumu d'antibióticos na pandemia de la covid que podría esplicase pol usu de midíes de protección como la mázcara, y la sospecha mayoritaria de que l'orixe de les infecciones respiratories yera víricu, polo que pal so tratamientu nun tán indicaos estos fármacos.

Ello ye que al comparar la tasa mensual de consumu en neños, confrmóse un amenorgamientu del 66% del usu d'antibióticos de marzu a avientu de 2020 al respective de 2019. En relación cola población adulta, esi amenorgamientu asítiase nel 27,6% y les mayores baxaes rexístrénse ente marzu y mayu, lo mesmo que d’ ochobre a avientu.

L'estudiu realízase colos datos apurríos pola sección de Farmacia de la Subdireición d'Infraestructures y Servicios Técnicos del Serviciu de Salú del Principáu (Sespa), qu'inclúi información sobre la prescripción d'antibióticos en consultes de medicina de familia y pediatría y despachaos nes farmacies de les ocho árees sanitaries.

 

Automatización del rexistru d'usu

El Principáu foi una de les primeres comunidaes autónomes en automatizar el rexistru del consumu d'antibióticos n'atención primaria, de cuenta que yá se dispón de datos desglosaos por franxes etarias y llueu va activase tamién la diferenciación por sexos.

La mecanización d'esti sistema va revertir en seguridá pa los equipos de los programes d’optimización d'usu d'antibióticu y va facilitar el control del consumu. Tamién va ayudar a la puesta en marcha d'acciones informatives y formatives p'ameyorar la calidá de la prescripción y aumentar la seguridá de los pacientes.

L'usu desaparente d'antibióticos resta eficacia nel tratamientu d'enfermedaes infeccioses como neumoníes, tuberculosis y meninxitis d'orixe bacterianu, ente otres.