• ​​​​El proyectu, que va licitase de forma inminente, tien un plazu d’execución de 23 meses y inclúi delles actuaciones orientaes a prevenir daños na capital parraguesa en casu de llenes
• El Gobiernu va autorizar mañana na so reunión selmanal el gastu pa esti proyectu, que forma parte del conveniu firmáu col Ministeriu pa la Transición Ecolóxica y l’Ayuntamientu de Parres pa invertir más de 17 millones na zona

El Conseyu de Gobiernu va aprobar mañana, na so xunta selmanal, un gastu de 3.219.128 euros pa contratar les obres incluyíes na segunda fase del proyectu p’amenorgar el riesgu d'hinchentes nel núcleu urbanu de Les Arriondes. Anguaño, los ríos Piloña y Chicu, al so pasu pela capital parraguesa, presenten tramos con capacidaes de desagüe inferiores a les necesaries en casu de llenes, una situación que s'acentúa pola presencia de torgues puntuales, tantu nel calce mesmu como nes márxenes. Los trabayos previstos, que van ser cofinanciaes con fondos Feder, busquen prevenir daños y evitar los problemes que causen les crecíes.

L'actuación, que cunta con un plazu d'execución de 23 meses, inclúi distintes intervenciones sobre dambos ríos y la so redolada. En concretu, les principales obres nel Chicu van consistir na ampliación de la sección de desagüe. Con esti fin, va construyise un murete llonxitudinal y una mota –un montículu realzáu de tierra- pa la protección contra les llenes na marxe derecha, concretamente ente l'Hotel Ribera del Chicu y el pasu de la carretera a Bodé. Tamién va alzase’l camín de ribera nesta marxe, ente la vía d'accesu a esta localidá y la confluencia del Chicu col Sella.

Amás, van executase meyores nel colector esistente, amás de nos drenaxes de les instalaciones de la piragüera municipal y del pasu sol ferrocarril de la carretera a Bodé. Igualmente, va sustituyise'l pasu de regar so la carretera AS-260, paralela al ríu, y van construyise redes de drenaxe d'agües de lluvia.

En cuanto al ríu Piloña, va alzase la rasante del terrén na zona del parque de La Llera, onde tamién va facese lo propio col tableru de la pasarela peatonal p'ameyorar la capacidá de desagüe, lo que va repercutir nun menor nivel d'agua nes zones colindantes col ríu. Per otra parte, van protexese con un muriu la piscina y el camping allugaos nesta área.

Los fondos destinaos a esta fase de les obres, que'l Principáu va licitar de forma inminente, van distribuyir en trés añalidaes: 200.000 euros anguaño, 1,9 millones el próximu y 1.119.128, en 2023.

--Un proyectu ambiciosu d’intervención de les trés alministraciones

La segunda fase del proyectu pa prevenir hinchentes en Les Arriondes forma parte del conveniu suscritu ente'l Ministeriu pa la Transición Ecolóxica y el Retu Demográficu, el Principáu y el Conceyu de Parres que va movilizar más de 17 millones pa garantizar la protección de la capital parraguesa énte les crecíes.

L'alcuerdu concrétase en delles fases. La primera d’estes correspuende a l'Alministración central, que va apurrir 12.719.585 euros p'actuar nos ríos Sella y Piloña. Esta actuación ta pendiente d'axudicación, en rematando yá la correspondiente fase de llicitación, a la que concurrieron una decena d'empreses.

Nel Piloña van executar obres de defensa de la marxe esquierda, ente la zona hospitalaria y la confluencia col Sella. Tamién se van acondicionar los regueros afluentes na mesma marxe, va sustituyise la ponte de la carretera d'accesu al  parque de La Concordia y va executase la rede de drenaxe a lo llargo del paséu.

Igualmente, nel Sella van acometese llabores de defensa de la marxe esquierda ente les confluencia colos ríos Piloña y Chicu y va executase la rede de drenaxe d'agües d'agua a lo llargo del paséu.

La última fase de l'actuación va afectar a la ponte sobro'l ríu Chicu, nel que se va executar un nuevu trazáu que nun condicione l'accesu a Les Arriondes pol pasu inferior so les víes del ferrocarril Uviéu-Santander. Esta fase 3, xuntu cola 2, son les qu'asume'l Principáu con una inversión global de 4.243.264 euros.

Pela so parte, el Conceyu de Parres dexará los terrenes necesarios pa executar los trabayos.​​