Categories Navigation

Categories Navigation

El Gobiernu d’Asturies alerta sobre un nuevu intentu d’estafa nes residencies de mayores

29/11/2021
  • Dellos centros del ERA recibieron llamaes p’avisar d’una supuesta auditoría y desinfección de los espacios 
  • La xerente del organismu autónomu alvierte de que “son actuaciones ilícites y engañosas de les que los responsables de les instalaciones han tar al tanto” 

El Gobiernu d'Asturies sollerta d'un nuevu intentu d'estafa nes residencies de mayores asturianes. Ye'l terceru dende l'entamu de la pandemia.

Nesta ocasión, les residencies que recibieron llamaes engañoses nos últimos díes fueron les de Les Arriondes, L’Infiestu y El Naranco (Uviéu), toes de la rede pública del organismu autónomu Establecimientos Residenciales d'Asturies (ERA). Los responsables de los centros afectaos informaron de momentu a la xerencia del ERA, de cuenta que nun se concretó estafa dalguna.

Na residencia d'El Naranco, una persona llamó para asegurar que yera necesariu apurrir un material sanitariu nel centru y asina poder pasar una supuesta auditoría. El casu de Les Arriondes foi asemeyao. Una persona telefonió y fíxose pasar por un xestor de la Conseyería de Salú p’anunciar qu'a otru día diba llevase a cabu una desinfección de les instalaciones y una evaluación de les midíes preventives contra la covid. Amás, aseguró que la xerencia del ERA conocía esta actuación, pero tol procesu descritu yera un engañu. La tercer residencia afectada foi la de L’Infiestu, onde los responsables del centru decatáronse de que se trataba d'un intentu de fraude.

La Conseyería de Derechos Sociales y Bienestar alvierte de qu'esti tipu de comunicaciones nunca son oficiales y aconseya que se denuncien siempre. “Trátase d'actuaciones ilícites y engañoses de les que responsables de les instalaciones tienen de tar al tantu”, afirmó Ana Suárez, xerente del ERA, quien estimó a los centros la so profesionalidá y rápida respuesta énte estos intentos d'estafa.

N'ochobre de 2020, delles residencies yá recibieron llamaes de la mesma índole pa solicitar un pagu por material sanitariu, supuestamente del ministeriu. Esos intentos repitiéronse a principios d'esti añu. “Ye importante dar a conocer estos casos a tola rede, tanto la pública como la privada, pa evitar que losl estafadores consigan el so propósitu”, alvirtió la xerente del ERA.

La Conseyería de Derechos Sociales va unviar una circular a tolos centros d'estes característiques pa informa-yos y evitar posibles fraudes. ​​​​​​​