Categories Navigation

Categories Navigation

El Principáu caltién cortada l’AS-15 al altor de Soutu (Tinéu) pol riesgu de que se produzan argayos nuevos

29/11/2021

Un momento de la visita


  • Estableciéronse dos itinerarios alternativos per Tinéu pa evitar el pasu pela zona afectada

​​​​​​​El Gobiernu d’Asturies decidió, en coordinación cola Guardia Civil y desque evaluáu l’estáu de la lladera, caltener cortada la carretera AS-15 al altor de Soutu (Tinéu). El corte atópase nel quilómetru 31,8 d’esta vía, que xunta Corniana y el puertu de Zarréu, zona onde hubo un argayu.
 
La rotura d’una peñona asitiada a más de 200 metros sobre la carretera AS-15, fuera del dominiu d’ésta, produció la nueche del sábadu la cayida sobre la vía de munches piedres. La situación meteorolóxica tan complicada torga, de momentu, realizar los llabores de llimpieza de la vía y asegurar la fastera.
 
Los técnicos de la Conseyería de Mediu Rural y Cohesión Territorial, que se treslladaron al sitiu del argayu momentos depués de producise, realizaron una primer evaluación de la situación. En cuanto les condiciones meteorolóxiques dexen, va destorgase la vía y los técnicos van valorar cuála ye la meyor solución técnica. L’actuación va suponer instalar una pantalla dinámica sobre la turria pa evitar más argayos.
 
El Principáu, en collaboración cola Central operativa de Tráficu d’Asturies (COTA), estableció dos itinerarios alternativos pa los usuarios del corredor del Narcea. En sentíu Corniana, l’esvíu faise en La Florida, al traviés de l’AS-215, mentes qu’en sentíu Zarréu los vehículos tienen que s’esviar en Soutu (Salas) pela AS-370. En dambos casos usen la nacional 634 y l’AS-216 como rutes alternatives de camín escontra y dende’l suroccidente.
 
El Gobiernu del Principáu espera que la situación meteorolóxica ameyore y pueda llimpiase y asegurar la vía lo primero posible en condiciones de seguranza pa los trabayadores y los usuarios de l’AS-15. ​​​​​


​​​​​​​