Categories Navigation

Categories Navigation

El Principáu decide zarrar cinco carreteres de la rede autonómica por riesgu alto d'argayos

29/11/2021
  • El serviciu d'asistencia técnica pa la seguranza propón a Tráficu prohibir la circulación polos puertos de Somiedu, Ventana, San Isidro y Tarna y l'accesu a Sotres

 
Les condiciones meteorolóxiques adverses que sufre Asturies incrementaron l'alerta por riesgu d'argayos al nivel 3 o riesgu alto. Dada esta situación, y tal como determina'l Plan de Viabilidá Ivernal, el Gobiernu del Principáu propunxo'l zarru al tráficu pa tou tipu de vehículos en cinco carreteres de la rede rexonal: los puertos de Somiedu, Ventana, San Isidro y Tarna y l'accesu a la localidá de Sotres, en Cabrales.
 
La cota de nieve, qu'a última hora de güei asitiábase en redol a los 500 metros d'altitú, va xubir pasu ente pasu mañana hasta los 1.500 metros. Los equipos técnicos que trabayen de forma conxunta cola Dirección Xeneral d'Infraestructures consideren que puen producise argayos de nieve recién mientres la primer parte del día y de nieve húmedo a partir de la tarde. Nos más de los casos, van ser argayos pequeños, pero en delles ocasiones podríen adquirir mayor relevancia.
 
A partir d'esta valoración técnica, el Gobiernu del Principáu propunxo a Tráficu'l zarru d’estes carreteres: la del puertu de Somiedu (AS 227) ente los quilómetros 42,5 y 50,8, la del puertu de Ventana (AS-228) ente los quilómetros 35,5 y 38,2, la del puertu de San Isidro (AS-112) ente los quilómetros 32,3 y 42,4, la del puertu de Tarna (AS-117) ente los quilómetros 58,5 y 65,5 y la d'accesu a Sotres (AS-264), ente los puntos quilométricos 13,6 y 16.
 
Les brigaes de caltenimientu van siguir desenvolviendo los sos programes de trabayu nestes víes, pero van afaer los sos llabores a les midíes de seguranza qu'establez el protocolu. En casu de algamar el nivel de riesgu bien alto, los trabayos suspenderíense.
 
El zarru de la carretera a los vehículos ye tamién pa los peatones. Los servicios d'emerxencia van poder acceder a les víes en casu de necesidá, siempre y cuando nesi momentu les condiciones de llimpieza y seguranza de la vía lo dexen. Los espertos va reevaluar mañana'l nivel d'alerta.
 
El Gobiernu d'Asturies encamienta a la ciudadanía qu'estreme la precaución y nun viaxe, sacante los desplazamientos que nun puedan retardase y tean debidamente xustificaos.​​​