Categories Navigation

Categories Navigation

El Principáu sofita los planes d’AVS Millenium pa impulsar un grupu líder en sanidá, servicios sociales y restauración

29/11/2021

​​​​​​​Un momento de la visita

  • La Sociedá Rexonal de Promoción concedió a la empresa un préstamu de dos millones pa facilitar la so crecedera .
  • La operación, la más importante de la SRP anguaño, sofita una inversión de 6,6 millones que va dexar crear 474 empleos nuevos.

El Gobiernu d'Asturies, al traviés de la empresa pública Sociedá Rexonal de Promoción (SRP) concedió un préstamu participativu de dos millones a la compañía AVS Millenium Salud pa impulsar la so actividá nos sectores de la sanidá, los servicios sociales y la restauración. Con esta operación, la SRP favorez la creación d'un grupu empresarial formáu por aproximao 3.000 trabayadores, con una inversión inducida de 6,6 millones y la creación de 474 empleos nuevos en dos años.

El proyectu cunta tamién con financiación d'Hunosa Empreses, nun exemplu de collaboración y cofinanciación público-privada.

Asina lo anunció güei la conseyera de Derechos Sociales y Bienestar, Melania Álvarez, mientres una visita a la sede social del grupu en Llanera, a la que tamién asistieron el director xeneral d'Empléu y Formación, Pedro Fernández-Raigoso, y la directora xeneral de Xestión de Derechos Sociales, Paula Álvarez. Los trés axuntaron col presidente d’AVS Salud, Jesús Cocina, y cola presidenta de la SRP, Eva Pando, pa encarar los detalles de la operación.

Melania Álvarez punxo en valor la busca, por parte de la compañía, de la calidá de vida de les persones: “un apueste novedosu qu'encara'l bienestar y ufierta servicios de manera coordinada”.

Pela so parte, Pedro Fernández-Raigoso señaló que la inversión “ye frutu de la collaboración público-privada y supón un apueste p’Asturies nun sector con potencial grande, reforzando la creación d'empléu na industria de servicios sociosanitarios”.

AVS Salud surde de la integración de trés empreses: Azvase, CKSenior y Visama, con actividaes complementaries qu’incluyen de manera integral los ámbitos de la sanidá y del bienestar social. En total, xestiona 18 centros d'atención residencial públicos y privaos con 1.217 places y empresta servicios de restauración a 50 centros sociales, sanitarios, educativos y empreses de toa España.

Dende la so sede n'Asturies, con algame al mercáu nacional y con proyección internacional, AVS va xenerar les sinerxes propies d'una cadena de valor que va integrar servicios de restauración y alimentación saludable, d'atención a persones mayores y dependientes (dende la so rede de centros residenciales y d'ayuda a domiciliu), y sanitarios (dende'l so centru hospitalariu Covandoga, en Xixón).

La SRP xestiona na actualidá 52 millones d'euros invertíos en 48 empreses pertenecientes a distintos sectores, ente los que destaquen el tecnolóxicu, l'industrial, l’agroalimentariu, la biotecnoloxía, la inxeniería, la economía circular, la sostenibilidá o la moda. Tres esta inversión nueva, la sociedá entra nos ámbitos sanitariu y sociosanitariu.


Audio de la consejera de Derechos Sociales y Bienestar, Melania Álvarez (mp3: 370 Kb)