• La conseyería adelanta les orientaciones d’aplicación del real decretu publicáu pol ministeriu pa empezar la implantación de la LOMLOE.

La Conseyería d’Educación presentó güei a les direcciones de los centros, nuna ronda de xuntes telemátiques, el borrador de les instrucciones coles que’l Principáu va aplicar la evaluación, la promoción y la titulación del alumnáu, d’alcuerdu col real decretu publicáu pol Ministeriu d’Educación y Formación Profesional. Una de les principales novedaes ye la desapaición de les pruebes estraordinaries n’ESO, exámenes que sí se caltienen en Bachilleratu.

L’Alministración educativa trabaya asina na implantación de la llei educativa nueva, la LOMLOE. En paralelo, ta realizando’l desenvolvimientu curricular de toles etapes que van empezar el cursu que vien.

Esta ye la información que treslladó la conseyera d’Educación, Lydia Espina, acompañada pol director xeneral d’Ordenación, Evaluación y Equidad Educativa, David Artime, na ronda d’alcuentros coles direcciones de los centros de les etapes non universitaries, incluyíos los Centros d’Adultos (Cepes).

Les instrucciones que ta peracabando la conseyería incluyen una partida de consideraciones xenerales comunes pa toos, como son el derechu del alumnáu a una evaluación oxetiva, la participación de les families, el calter orientativu de los estándares actuales d’aprendimientu o’l fechu de que l’equipu docente va ser el que tome los determinos sobre la promoción y la titulación de manera colexada.

Otra manera, les instrucciones rescaten los programes de diversificación curricular pal alumnáu con dificultaes relevantes d’aprendimientu. L’adopción d’esta midida d’atención a la diversidá quier ayudar a la superación d’eses dificultaes y, polo tanto, al llogru del títulu d’ESO.

En Primaria, les decisiones de promoción van adoptase al rematar segundu, cuartu y sestu cursu, mentes qu’en primeru, terceru y quintu va ser automática. Al rematar, va emitise un informe sobre la evolución y el grau d’adquisición de competencies del alumnáu, que va garantizar la continuidá ente etapes.

En Secundaria, amás d’eliminar la convocatoria estraordinaria y establecer una única evaluación al rematar el cursu académicu, les instrucciones recueyen que van promocionar aquellos estudiantes que l’equipu docente considere qu’adquirieron les competencies correspondientes. De toles maneres, van pasar de cursu quien superaren toles materies o tengan evaluación negativa nuna o dos.

Va titular, nuevamente, l’alumnáu que l’equipu docente considere qu’algamó los oxetivos de la etapa. Eses decisiones han ser colexaes. El títulu nun va incorporar la nota media.

Al respective de Bachilleratu, van promocionar de primeru a segundu quien superaren toles materies o tengan, a lo más, dos suspenses. Nesti casu, sí va haber una prueba estraordinaria primero de qu’empiece’l cursu siguiente de les asignatures que nun s’aprobaron.

Pa sacar el títulu de Bachilleratu, va ser menester la evaluación positiva de toles asignatures. Sicasí, escepcionalmente, va poder titulase con una suspensa, siempre que l’equipu docente considere que se cumplieron los indicadores que se recueyen nes instrucciones y d’alcuerdu colos sos propios documentos de centru.

Amás, l’alumnáu de la Formación Profesional (FP) básica va poder graduase n’ESO si supera tolos módulos incluyíos nel ciclu onde se matriculare.

Aparte de los cambeos normativos, tanto la conseyera como’l director xeneral tresmitieron un mensaxe de tranquilidá a les direcciones al respective de la evolución de la pandemia de la covid-19. En llinia col boletín unviáu la selmana pasada, esplicaron qu’Educación sigue trabayando de la mano con Salú y recordaron la necesidá d’esforciase nes midíes incluyíes nos planes de continxencia de los centros, énte la evolución negativa rexistrada nes últimes selmanes.