• Melania Álvarez destaca’l “llabor fundamental” que realiza esti sector por una sociedá “más igualitaria” .
• El certame entamáu ente 33 institutos asturianos pola mor del día mundial selecciona 15 ganadores nes categoríes de carteles y vídeos.

El Gobiernu d’Asturies va poner en marcha l’añu que vien l’Observatoriu del Voluntariáu, un recursu que va dexar disponer d’una radiografía exacta de la situación, debilidaes y fortaleces d’esti sector n’Asturies. Según esplicó güei la conseyera de Derechos Sociales y Bienestar, Melania Álvarez, esti dispositivu va arrincar de la mano de la Plataforma Asturiana de Voluntariáu, que va cuntar con una subvención de 20.000 euros pal so desenvolvimientu.

“El compromisu con esti sector ye fundamental, por eso nel presupuestu viniente caltiénense les cantidaes de les aportaciones a los centros de voluntariáu y participación, que l’añu pasáu aumentaron nun 30 %”, aseguró la conseyera. Nesta mesma llinia, tamién se caltién la convocatoria de 65.000 euros pal sofitu a los gastos de seguros y formación d’unes 50 entidaes d’esti ámbitu.

Pola mor del Día Internacional del Voluntariáu, que se celebra’l 5 d’avientu, la Conseyería de Derechos Sociales y Bienestar entamó güei el certame Voluntad.es… lo que te diferencia, que se celebra dende’l 2005 en collaboración con 32 entidaes de la Rede de Centros de Voluntariáu y Participación Social, el Conseyu de la Mocedá, les asociaciones del sector que trabayen n’Asturies y la Rede Europea de Llucha cola probeza y la esclusión social (EAPN Asturies). Anguaño diéronse trece premios na categoría de cartelos y otros dos na de videu.

Álvarez destacó’l llabor fundamental qu’exercen les persones voluntaries, con una so vocación de serviciu y solidaridá que ye necesaria pa llograr una sociedá más igualitaria, que garanticen los derechos de toles persones”

Les trece imáxenes escoyíes van usase pa iguar un calendariu y una llibreta que se van repartir ente los 33 institutos d’enseñanza secundaria participantes, nos que cursa los estudios la mocedá que presentó los sos trabayos al certame y que recibió talleres de formación y sensibilización nes aules. Esta formación impartióse polos centros de Voluntariáu y Participación Social y de la Plataforma de Voluntariáu d’Asturies, en collaboración col profesoráu de los institutos.

Amás, los dos vídeos ganadores van difundise tamién ente los centros educativos y dende les redes sociales de les entidaes organizadores.