• La nueva aplicación dexa a los conceyos actualizar en tiempu real el llistáu d'equipamientos, espacios al campu y senderos pa bicicletes y caballos

La Dirección Xeneral de Deporte sigue col so llabor de modernización y acaba de llanzar una ferramienta con xeolocalización p’actualizar el censu d'instalaciones y espacios deportivos d'Asturies. L'aplicación dixital, que dexa permite al usuariu consultar los llugares onde puede practicase deporte con un simple clic, incorpora, amás d'equipamientos, la rede de senderos pa bicicletes y caballos, localizaciones pal surf ya información d'interés pa la práctica d'actividá física n'espacios non convencionales.

L'aplicación ta disponible en trés idiomes (castellán, asturianu ya inglés) y permite xeolocalizar los espacios de forma fácil ya intuitiva. El departamentu de Deporte respuende asina a la demanda existente sobre la posibilidá de consultar l'allugamientu d'equipamientos nel territoriu de la comunidá, tanto espacios zarraos como al aire llibre.

Esta ferramienta va permitir  desenvolver programes deportivos que dean respuesta a los vezos de la población y va tar al serviciu de los conceyos, que van poder dar d'alta les sos nueves instalaciones o incorporar les meyores realizaes nelles. D'esta miente, el rexistru va poder tar actualizáu casi en tiempu real. Tola información puede incorporase de forma automática nos sitios web municipales, yá que s'ufierta a les corporaciones locales la posibilidá de tener un módulu propiu nel nuevu censu interactivu.

Nos próximos díes, la Dirección Xeneral de Deporte va dar a conocer la nueva ferramienta nos distintos conceyos y va informar sobre'l trabayu necesariu para una correcta coordinación que permita caltener el censu actualizáu de forma permanente.

 L'aplicación, va tar disponible a partir del día 13 d'avientu na web  de la Dirección Xeneral de Deporte: www.deporteasturiano.org. ​​