• —El proyectu de cuentes pal próximu exerciciu inclúi una partida pa empecipiar el procesu que va convertir el Muséu del Xurásicu en centru d'investigación .

El Principáu va poner en marcha en 2022 un plan pa captar nómades dixitales y convertir Asturies nun llugar de referencia pa teletrabayar. La Conseyería de Ciencia, Innovación y Universidá va afitar el focu na meyora de les telecomunicaciones pa colectivos vulnerables, al traviés del bonu dixital, y pa polígonos industriales, edificios públicos y viviendes particulares.

El conseyeru de Ciencia, Innovación y Universidá, Borja Sánchez, presentó esta mañana les grandes cifres del proyectu de presupuestos del so departamentu pa 2022, que xuben a 211 millones, un 6,1% más qu'esti añu, de los que 3,1 vienen de los fondos europeos del Mecanismu pa la Recuperación y la Resiliencia (MRR).

Sánchez escoyó'l Muséu del Xurásicu d'Asturies (Muja), en Colunga, pa informar sobre les cuentes como un chisgu a esti equipamientu, qu'aspira a convertise en centru d'investigación rexonal. Ello ye que el primer pasu contémplase yá nel proyectu presupuestariu del próximu exerciciu con una pequeña partida de 15.000 euros pa impulsar un conveniu cola Universidá d'Uviéu.

Amás, Colunga forma parte de la Rede de Conceyos con Ciencia, asitiada sobre los Centros de Dinamización Tecnolóxica Local (CDTL), que'l próximu añu tamién van ver reforzada la partida económica, con 1,7 millones, pa desenvolver proyectos d'innovación social que contribuyan a acabar cola fienda na zona rural.

Una Asturies hiperconectada y atractiva pal teletrabayu

Uuna de les llinies que se refuercen nel proyectu de presupuestos ye l'apartáu de telecomunicaciones, que crez un 36%, coles mires d'avanzar hacia una Asturies hiperconectada. Dientro d'esti capítulu, va ponese en marcha un plan pa captar nómades dixitales, esto ye, persones que teletrabayen y busquen un llugar con calidá de vida pa morar o pasar temporaes. L'oxetivu final ye afitar población, especialmente en zones rurales. Pa la puesta en marcha d'esti programa van destinase 260.000 euros.

Como novedá, va aplicase'l bonu dixital destináu a ameyorar la conexón a banda ancha fixa, con una velocidá mínima de 30 Megabytes, pa persones o families identificaes como vulnerables. Va haber un bonu por familia con una cuantía máxima de 240 euros al añu. Esta ayuda, pa la que se acuten 270.000 euros procedentes de fondos europeos, va beneficiar a daqué más de mil families el próximu añu.

Tamién se van dedicar 1,7 millones a ampliar la rede y dotar de meyores conexones a polígonos industriales, centros de referencia de titularidá pública y edificios antiguos que nun disponen d'instalaciones afayadices pa facer llegar la banda ancha a les viviendes.

Toes estes acciones son complementaries al esplegue de los Planes de Banda Ancha (PEBA) y al próximu Plan Únicu, qu'escuerre llevar la conectividá al cien por cien de la población.

Medra pa la Universidá d'Uviéu

Como ye habitual, la Universidá d'Uviéu tien un pesu específicu dientro del presupuestu de la Conseyería de Ciencia y llévase la mayor parte de los 159 millones del capítulu correspondiente a la Dirección Xeneral d'Universidá. Destaca sobremanera la medra de l'aportación ordinaria, que supera los 140 millones, un 2,7% más qu'esti exerciciu, a los qu'hai que sumar les partíes de tresferencia corriente y tresferencia de capital.

Más apoyu al alumnáu ya investigadores predoctorales

L'alumnáu ocupa un llugar fundamental nes cuentes del próximu exerciciu. Asina, daqué más de 6 millones van empobinase a facilitar que naide quede fuera de la Universidá por falta de recursos económicos. La compensación d'ingresos a la institución académica pola conxelación de tases llevará la mayor parte d'esa cuantía, daqué más de 5,3 millones. El restu va destinase a compensar la matrícula d'estudiantes con discapacidá, beques pa alumnáu d'urxente necesidá, ayudes pa cursar másteres y sofitu pa programes de movilidá internacional.

El financiamientu destináu a contratos d'investigadores predoctorales ye otra de les llinies destacaes, con 5,6 millones que cubren les cinco convocatories del Programa Severo Ochoa vixentes, y la medra retributiva del Estatutu de Personal Investigador en Formación (EPIF).

Ayudes a la innovación empresarial y el talentu

Nel capítulu d'I+D+i destínense casi 28 millones a la innovación empresarial y les ayudes pa l'atracción y retención de talentu, fundamentalmente al traviés del Institutu de Desenvolvimientu Económicu del Principáu (Idepa) y de la Fundación pa la Investigación Aplicada y la Tecnoloxía (Ficyt). Más de 15 millones d'esta partida van cubrir les convocatories de la carrera científica llanzaes anguaño.

Ente los programes novedosos, destaca la Compra Pública Innovadora, con 600.000 euros, que va tratar d'abrir una nueva llinia centrada na industria aeroespacial n'Asturies, col desenvolvimientu de tecnoloxía que permita poner en marcha un nanosatélite de telecomunicaciones.

L'oxetivu de los programes d'I+D+i va centrase n'incrementar tanto'l personal dedicáu a la investigación y l'innovación n'Asturies como la creación de texíu granible innovador, especialmente al traviés de pymes y empreses de base tecnolóxica.