(​​​​​​​Nota: la versión castellana es la correcta)

• El Gobiernu d'Asturies va invertir 1,5 millones na rehabilitación de dellos tramos del AS-15 ente Sotu de los Infantes y Zarréu.
• L'Executivu va actuar tamién nel AS-237, con un presupuestu de 1,1 millones, y na LN-8, con una partida de 1,5 .

El Gobiernu d'Asturies aprobó un gastu de 3.189.100 euros destináu a la meyora de trés carreteres de titularidá rexonal: l'AS-15 (Corniana-Zarréu), l'AS-237 (Grau-Avilés) y la LN-8 (Campumanes- La Cubiel.la).

Asina, van dedicase 1,5 millones a la meyora de dellos tramos del AS-15 (el corredor del Narcea), ente Soutu de los Infantes (Salas) y el puertu de Zarréu (Cangas del Narcea). A lo llargo de casi 90 kilómetros, va trabayase na adecuación del firme de delles zones por aciu l'aplicación d'una nueva capa de rodadura y la rehabilitación de fundimientos.

L'actuación, cofinanciada con fondos Feader, cuenta con un presupuestu de 1.535.686 euros estremaos en dos añalidaes: 1.035.686 pa 2022 y 500.000 pa 2023. Trátase d'una obra bien demandada, que pretende dotar de mayor seguridá a los usuarios de la vía. Amás, va emprestase especial atención a la meyora de los tramos ente Soutu de Los Infantes y la llende del conceyu de Salas, Chanu-La Riegla y L.larón- Fondos de Veiga.

Otra de les inversiones va destinase a la meyora de la carretera AS-237 nel tramu que xune Grullos (Candamo) y La Peral (Illas), pa la que se previeron 1.119.379 euros. L'actuación, cofinanciada tamién con fondos Feader, cuenta con presupuestu tresañal: 1.009.379 euros pa 2022 y 110.000 pa 2023.

Les obres consisten na 'aplicación d'una nueva capa de rodadura nos más de diez kilómetros de vial que xune dambes localidaes, l'arreglu d'un fundimientu nel kilómetru 15, la meyora del sistema de drenaxe y la renovación completa de la señalización vertical y horizontal. Amás, van regulase nueves zones d'adelantamientu y va afitase en 60 kilómetru por hora la velocidá máxima de la vía.

A lo último, el Principáu aprobó un gastu de 1.534.033 euros pa la segunda fase de la meyora de la carretera LN-8, que xune Campumanes y el puertu de La Cubilel.la, estremáu en dos añalidaes: 1.084.034 pa 2022 y 449.999 pa 2023. L'actuación ta cofinanciada al traviés del fondu Feader.

Nesti casu, los trabayos van centrase na renovación del firme, la construcción de dos escolleres y cuatro murios de formigón, l'adecuación del sistema de drenaxe y la reposición de la señalización vertical y horizontal.